ബങ്കറിൽ ഏഴുദിവസം; ഒടുവിൽ​ സ്വാതി വീടണഞ്ഞു

ആലപ്പുഴ: യുക്രെയ്​നിലെ ഖാർകിവിൽ റഷ്യൻ ആർമിയുടെ ഷെല്ലാക്രമണത്തിൽ താമസിച്ച കെട്ടിടത്തിന്‍റെ മുകളിലേക്ക്​ ബോംബ്​ വീണപ്പോൾ സ്വാതിവിറച്ചുപോയി. ഇനി രക്ഷപ്പെടില്ലെന്നാണ്​ കരുതിയത്​. ഭയന്നുവിറച്ചതോടെ അമ്മയുടെ ഫോണിലേക്ക്​ വിളിയെത്തി. സംസാരത്തിനിടെ മുറിഞ്ഞുപോയ വാക്കുകൾക്കിടെ പറയാതെ പറഞ്ഞു 'അമ്മയെ ഇനി കാണാൻ പറ്റുമോയെന്ന്​ അറിയില്ല'. ഒടുവിൽ ആശ്വാസമായത്​ തിങ്കളാഴ്ച രാത്രി 11.30ന്​ ആലപ്പുഴ കറുകയിൽ വാർഡിലെ​ വീട്ടിലെത്തിയപ്പോഴാണ്​. ഖാർകിവ്​ വി.എൻ കറാസിൻ യൂനിവേഴ്​സിറ്റിയിലെ രണ്ടാംവർഷ എ.ബി.ബി.എസ്​ വിദ്യാർഥിയായ എസ്​. സ്വാതി ഫ്ലാറ്റിലാണ്​ താമസിച്ചത്​. യുദ്ധം രൂക്ഷമായതോ​ടെ ഹോസ്റ്റലിന്‍റെ ബങ്കറിലേക്ക്​ മാറി. 300ൽഅധികം വിദ്യാർഥികൾ ഒപ്പമുണ്ടായിരുന്നു. ഏഴ്​ദിവസമാണ്​ ഇവിടെ തങ്ങിയത്​. അവസാനനിമിഷം ഭക്ഷണം ഒരുനേരമായി ചുരുങ്ങിയതോടെ ഏങ്ങനെയെങ്കിലും ഖാർകിവ്​ വിടാൻ തീരുമാനിച്ചു. അതിർത്തികടന്നെത്താനായിരുന്നു എംബസി നിർദേശം. കോഓഡിനേറ്റർമാരുടെയും കൂട്ടുകാരുടെയും സഹായത്തോ​ടെ ജീവൻ പണയപ്പെടുത്തി അലഞ്ഞുതിരിഞ്ഞാണ്​ അതിർത്തികടന്നത്​. ഖാർകിവിൽനിന്ന്​ പുറപ്പെട്ട ട്രെയിനിൽ കയറി വിൻസിവരെ എത്തി. എട്ടംഗസംഘത്തോടൊപ്പമായിരുന്നു യാത്ര. റെയിൽവേ സ്​റ്റേഷനിൽ എത്തിയപ്പോൾ സ്ഥിതിയാകെ മാറി. യുക്രെയ്​ൻകാരല്ലാത്ത ആരെയും അവർ കയറാൻ സമ്മതിച്ചില്ല. നേ​ര​ത്തേയെത്തിയ പലരെയും ട്രെയിനിൽനിന്ന്​ ഉപദ്രവിച്ച്​ താഴെയിടുന്ന സ്ഥിതിവരെയുണ്ടായി. അതെല്ലാം മറികടന്നാണ്​ ഹംഗറിയിലേക്ക്​ എത്തിയത്​. അവിടെയുണ്ടായിരുന്ന മലയാളികളെ കൂട്ടി ബസിൽ 10 മണിക്കൂർ യാത്ര നടത്തിയാണ്​ വിമാനത്താവളത്തിലെത്തിയത്​. മുംബൈ വഴിയാണ്​ കൊച്ചിയി​ലെത്തിയത്​. കെ.എസ്​.ആർ.ടി.സി ആലപ്പുഴ ഡിപ്പോയിലെ ജീവനക്കാരൻ സന്തോഷ് കുമാറാണ്​ പിതാവ്​. ആലപ്പുഴ ലീഗൽ സർവിസ്​ ഓഫിസ്​ ജീവനക്കാരി ബിന്ദു എസ്​. കുമാർ മാതാവും സ്വസ്തി സഹോദരിയുമാണ്​. APL SWATHI UKRAIN യുക്രെയ്​നിൽനിന്നെത്തിയ സ്വാതിയെ സ്വീകരിക്കുന്നു