കെ-റെയിൽ കല്ലിടൽ പിരളശ്ശേരിയിൽ നാട്ടുകാരുടെ പ്രതിഷേധം; സംഘർഷം

ചെങ്ങന്നൂർ: എം.സി റോഡിൽ മുളക്കുഴ ഗ്രാമപഞ്ചായത്തിലെ പിരളശ്ശേരിയിൽ കെ-റെയിൽ സിൽവർ ലൈൻ പദ്ധതിക്ക് കല്ലിടാനെത്തിയ ഉദ്യോഗസ്ഥ സംഘത്തിനുനേരെ സ്ത്രീകളടക്കമുള്ളവരുടെ വൻപ്രതിഷേധം. സംഘർഷത്തിനിടെ ഒരാൾ കുഴഞ്ഞുവീണു. കെ-റെയിൽ സിൽവർ ലൈൻ വിരുദ്ധ ജനകീയസമിതി നേതാക്കളടക്കം 18പേരെ അറസ്​റ്റ്​ ചെയ്തു. പ്രതിഷേധം മറികടന്ന്​ കല്ലിട്ടാണ്​ ഉദ്യോഗസ്ഥസംഘം മടങ്ങിയത്​. സംഘർഷത്തിനിടെ മുളക്കുഴ തച്ചിലേത്ത് വീട്ടിൽ റെജിയാണ്​ (55) കുഴഞ്ഞുവീണത്​. ഇയാളെ പൊലീസ്​ ​ ആശുപത്രിയിൽ എത്തിച്ചു​. വ്യാഴാഴ്ച രാവിലെ 10നാണ്​ ഉദ്യോഗസ്ഥസംഘം എത്തിയത്​. ബുധനാഴ്ചയും അതിനുമുമ്പും കല്ലിടാൻ എത്തിയപ്പോഴും നാട്ടുകാരുടെയും സമരസമിതിയുടെയും വൻപ്രതിഷേധമുയർന്നിരുന്നു.​ തുടർന്ന്​ സംഘം പിൻവാ​​​ങ്ങുകയായിരുന്നു. ഇത്​ കണക്കിലെടുത്ത്​ സർവസന്നാഹവുമായാണ്​ സംഘം വ്യാഴാഴ്ച കല്ലിടാനെത്തിയത്​. സ്ത്രീകളടക്കമുള്ളവരുടെ പ്രതിഷേധം അവഗണിച്ച്​ പിരളശ്ശേരി പാടത്ത്​ കല്ലിട്ടശേഷമാണ്​ 12പേരടങ്ങുന്ന ഉദ്യോഗസ്ഥസംഘവും പൊലീസും മടങ്ങിയത്​. പ്രവർത്തകരടക്കമുള്ളവരെ അറസ്റ്റ്​ ചെയ്തിട്ടും പ്രതിഷേധം തുടർന്നു. നാട്ടുകാരുടെ എതിർപ്പ്​ മറികടന്നുള്ള കല്ലിടൽ നടപടി ഉപേക്ഷിക്കണമെന്നും പൊലീസ് തിരിച്ചുപോകണമെന്നും കൊടിക്കുന്നിൽ സുരേഷ്​ എം.പി പറഞ്ഞു. പൊലീസ്​ കസ്റ്റഡിയിലെടുത്തവരെ ജാമ്യത്തിൽ വിട്ടയക്കണമെന്നാവശ്യപ്പെട്ട് കെ.പി.സി.സി വർക്കിങ്​ പ്രസിഡന്റ് കൊടിക്കുന്നിൽ സുരേഷ് എം.പിയുടെ നേതൃത്വത്തിൽ ചെങ്ങന്നൂർ പൊലീസ്​ സ്​റ്റേഷന്​ മുന്നിൽ ഒരു മണിക്കൂറോളം പ്രതിഷേധമുയർത്തി. അറസ്റ്റ്​ ചെയ്തവരെ സ്വന്തം ജാമ്യത്തിൽ വൈകീട്ടാണ്​ വിട്ടയച്ചത്​. പിരളശ്ശേരിയിൽ വരുംദിവസങ്ങളിലും പ്രതിഷേധം ശക്തമാക്കാനാണ്​ തീരുമാനം. സമരസമിതി നേതാക്കളായ ജില്ല കൺവീനർ മധു ചെങ്ങന്നൂർ, ടി. കോശി, ഫിലിപ് വർഗീസ്, റെജി തോമസ്, ജേക്കബ് വർഗീസ്, സ്റ്റീഫൻ വർഗീസ്, ഫിലിപ് ഐപ്പ്, കെ.വി. ജയിംസ്​ തുടങ്ങിയവരുടെ നേതൃത്വത്തിലായിരുന്നു പ്രതിഷേധം.