വള്ളത്തിൽ ഹൗസ്​ ബോട്ടിടിച്ച്​ യുവതി കായലിൽ വീണു; ഭർത്താവ്​ രക്ഷകനായി

മുറിവേറ്റ യുവതിയുടെ കാലിന്​​ 28 തുന്നിക്കെട്ട്​ ആലപ്പുഴ: കുടുംബത്തോടൊപ്പം യാത്രവള്ളത്തിൽ സഞ്ചരിച്ച്​ ഹൗസ്ബോട്ട് ഇടിച്ച് കായലിൽ വീണ യുവതിയെ ഭർത്താവ്​ അതിസാഹസികമായി രക്ഷിച്ചു. വീഴ്ചയിൽ ഹൗസ് ബോട്ടിന്റെ പ്രൊപ്പല്ലറിൽ തട്ടി മുറിവേറ്റ കൈനകരി കുപ്പപ്പുറം നടുത്തുരുത്ത് പാവത്തുശ്ശേരി വീട്ടിൽ ബിന്ദുവിന്‍റെ (43) കാലിന് 28 തുന്നിക്കെട്ട്​ വേണ്ടിവന്നു. കഴിഞ്ഞദിവസം രാവിലെ പുന്നമടക്കായലിൽ ഫിനിഷിങ് പോയന്‍റിലായിരുന്നു അപകടം. നടുത്തുരുത്തിലെ വീട്ടിൽനിന്ന്​ ആലപ്പുഴയിലെ ബന്ധുവിന്റെ വീട്ടിലെ ചടങ്ങിൽ പങ്കെടുക്കാൻ ബിന്ദു കുടുംബാംഗങ്ങൾക്കൊപ്പം എൻജിൻ ഘടിപ്പിച്ച വള്ളത്തിൽ വരുകയായിരുന്നു. ഫിനിഷിങ് പോയന്‍റിന്​ അടുത്ത്​ യാത്രപോകാൻ ഹൗസ് ബോട്ട് പിന്നിലേക്ക് തിരിച്ചപ്പോൾ വള്ളത്തിൽ ഇടിക്കുകയായിരുന്നു. വള്ളം ഉലഞ്ഞ് ബിന്ദു കായലിൽ വീണു. ബിന്ദു ഹൗസ് ബോട്ടിന്റെ അടിയിലേക്ക് പോയി. ഭർത്താവ്​ ബിനോജി (46) സാഹസികമായി എടുത്തുചാടിയാണ്​ രക്ഷിച്ചത്​. ഈ സമയം വള്ളത്തിലുണ്ടായിരുന്ന 12കാരൻ മകൻ അഭിനവും ബന്ധുക്കളും നിലവിളിച്ചു. ഹൗസ്ബോട്ടിന്റെ പ്രൊപ്പല്ലർ കറങ്ങുന്നുണ്ടായിരുന്നു. അതിലേക്ക് അടുക്കുന്നതിന്​ മുമ്പ്​ ബിന്ദുവിന്റെ മുടിയിൽ പിടിച്ച് ഉയർത്തിയാണ്​ എടുത്തത്​. ഇതിനിടെ, പ്രൊപ്പല്ലറിൽ തട്ടി വലതുകാലിൽ ആഴത്തിൽ മുറിവേറ്റു. ആലപ്പുഴയിലെ സ്വകാര്യ ആശുപത്രിയിൽ പ്രവേശിപ്പിച്ച ബിന്ദുവിന്‍റെ കാലിൽ തുന്നിക്കെട്ടുവേണ്ടിവന്നു. പള്ളാത്തുരുത്തി സ്വദേശിയുടെയാണ് ഹൗസ്ബോട്ട്​. അപകടമുണ്ടായ സമയം ഹൗസ്‌ബോട്ട് ജീവനക്കാര്‍ രക്ഷാപ്രവര്‍ത്തനത്തിന് മുൻകൈയെടുത്തില്ലെന്ന്​ ആക്ഷേപമുണ്ട്​. APL bindhu ഹൗസ്​ ബോട്ടിടിച്ച്​ വള്ളത്തിൽനിന്ന്​ കായലിൽ​ വീണ്​ കാലിന്​ പരിക്കേറ്റ ബിന്ദുവിനെ ആശുപത്രിയിൽ​ പ്രവേശിപ്പിച്ചപ്പോൾ