പെരുമ്പളത്തെ റോഡുകൾ പുനർനിർമിക്കണമെന്ന്​ ആവശ്യം

പെരുമ്പളം: പഞ്ചായത്തിലെ മുഴുവൻ റോഡുകളും സഞ്ചാരയോഗ്യമല്ലാത്ത നിലയിൽ പൊളിഞ്ഞിട്ട്​ നാളുകളേറെ. ഇതിലൂടെ സഞ്ചരിക്കേണ്ടിവരുന്ന ഓട്ടോറിക്ഷകളും ഇരുചക്ര വാഹനങ്ങളും വർക്​ഷോപ്പിൽനിന്ന് ഇറക്കാൻ പറ്റാത്ത അവസ്ഥയിലാണ്. നടുവൊടിക്കുന്ന കുഴികളാണ് മിക്കയിടങ്ങളിലും. പൊടിശല്യവും വാഹനയാത്രികരെയും വ്യാപാര സ്ഥാപനങ്ങളിലുള്ളവരെയും വലക്കുന്നു. അരയുകുളങ്ങര പറമ്പുകാട് റോഡ്, മാർക്കറ്റ് -ആശുപത്രി -പട്ടേകാട് റോഡ്, മാർക്കറ്റ് -വാത്തികാട് റോഡ്, അരയുകുളങ്ങര -ന്യൂ സൗത്ത് റോഡ്, കൊട്ടങ്ങാപ്പറമ്പ് -കാളത്തോട് റോഡ് തുടങ്ങിയവ പൂർണമായി തകർന്നു. ഓട്ടോറിക്ഷയിൽ ആശുപത്രിയിലേക്ക് രോഗിയെ എത്തിക്കുന്നത് ദുരിതമാകുന്ന സാഹചര്യം നിലവിലുണ്ട്. പെരുമ്പളത്തെ മുഴുവൻ റോഡുകളും സഞ്ചാരയോഗ്യമാക്കാൻ വേണ്ട നടപടി പഞ്ചായത്ത് ഭരണസമിതി സ്വീകരിച്ചില്ലെങ്കിൽ പ്രക്ഷോഭരംഗത്തിറങ്ങുമെന്ന്​ കോൺഗ്രസ്​ മണ്ഡലം പ്രസിഡൻറ് കെ.പി. ശശികുമാർ, ജനറൽ സെക്രട്ടറി സജീവ് പ്രഭാകരൻ എന്നിവർ അറിയിച്ചു. ചിത്രം: പൊട്ടിപ്പൊളിഞ്ഞ അരയുകുളങ്ങര-പനമ്പുകാട് റോഡ്