ചത്തിയറയിൽ വീണ്ടും കാട്ടുപന്നികൾ കൃഷി നശിപ്പിച്ചു

ചാരുംമൂട്: താമരക്കുളം ചത്തിയറ പ്രദേശത്ത് വീണ്ടും കാട്ടുപന്നികൾ കൃഷി നശിപ്പിച്ചു. ചത്തിയറ പൗർണമി ഭവനം പ്രസന്നന്റെ കൃഷിയിടത്തിലാണ് കഴിഞ്ഞ ദിവസം കാട്ടുപന്നികൾ ഇറങ്ങിയത്. നട്ട് രണ്ടുമാസമായതും കുലക്കാറായതുമായ ഇരുന്നൂറോളം വാഴകളാണ് നശിപ്പിച്ചത്. വാഴക്ക് നനക്കാൻ വെള്ളത്തിന് ബുദ്ധിമുട്ടുമ്പോഴാണ്​ കാട്ടുപന്നികളുടെ ശല്യം കൂടിയുണ്ടായത്. ശനിയാഴ്ച കൃഷിഭവനിൽനിന്ന്​ ഉദ്യോഗസ്ഥരെത്തി കൃഷിനാശം വിലയിരുത്തി. ഒന്നരമാസം മുമ്പ് ചത്തിയറ പടിഞ്ഞാറ് പ്രദേശത്ത് വാഴകളും കൃഷികളും കാട്ടുപന്നികൾ നശിപ്പിച്ചിരുന്നു. ചാരുംമൂട് മേഖലയിൽ വിവിധ പ്രദേശങ്ങളിൽ ആറുമാസമായി കാട്ടുപന്നികൾ ലക്ഷക്കണക്കിന് രൂപയുടെ കൃഷിയാണ് നശിപ്പിച്ചത്. ഫോട്ടോ: ചത്തിയറ പൗർണമി ഭവനത്തിൽ പ്രസന്നന്റെ കൃഷി കാട്ടുപന്നികൾ നശിപ്പിച്ചനിലയിൽ