അമ്പലപ്പുഴ ജങ്​ഷനിൽ വെയ്​റ്റിങ്​ ഷെഡ് വേണമെന്ന ആവശ്യം ശക്തം

അമ്പലപ്പുഴ: 70 കോടി ചെലവിൽ പുനർനിർമിച്ച അമ്പലപ്പുഴ-തിരുവല്ല റോഡിൽ അമ്പലപ്പുഴ കച്ചേരിമുക്കിൽ വെയ്​റ്റിങ്​ ഷെഡ്​ നിർമിക്കാത്തതുമൂലം യാത്രക്കാർ ദുരിതത്തിൽ. വെയിലും മഴയുമേറ്റ് ദുരിതത്തിലാണ്​ ബസ്​ കാത്തുനിൽക്കുന്നത്​. റോഡ്​ നിർമാണ സമയത്തുതന്നെ യാത്രക്കാരും നാട്ടുകാരും വെയ്​റ്റിങ്​ ഷെഡ്​ നിർമിക്കണ​മെന്ന്​ ആവശ്യപ്പെട്ടിരുന്നു. എന്നാൽ, വർഷങ്ങൾ കഴിഞ്ഞിട്ടും തിരുവല്ല ഭാഗത്തേക്ക് പോകുന്ന യാത്രക്കാർ പെരുമഴയിലും പൊരിവെയിലിലും നിൽക്കേണ്ട അവസ്ഥയിലാണ്. കടകളുടെ മുന്നിലാണ് പെരുമഴയിൽ യാത്രക്കാർ നിൽക്കുന്നത്. സ്കൂൾ തുറക്കുന്നതോടെ വിദ്യാർഥികൾ ഉൾപ്പെടെ യാത്രക്കാരുടെ എണ്ണം വർധിക്കും. മഴകൂടി ശക്തമാകുന്നതോടെ ദുരിതം വർധിക്കും. ആലപ്പുഴ-ചങ്ങനാശ്ശേരി റോഡ് അടച്ചതോടെ അമ്പലപ്പുഴവഴിയാണ് ഇപ്പോൾ കെ.എസ്.ആർ.ടി.സി കൂടുതലും സർവിസ് നടത്തുന്നത്. ഇതോടെ തിരുവല്ല ഭാഗത്തേക്കുള്ള യാത്രക്കാരുടെ എണ്ണവും വർധിച്ചു. വെയ്​റ്റിങ്​ ഷെഡ് നിർമിക്കാൻ അധികൃതർ തയാറാകണമെന്ന് സാമൂഹിക പ്രവർത്തകരായ ചമ്പക്കുളം രാധാകൃഷ്ണൻ, കരുമാടി മോഹനൻ എന്നിവർ ആവശ്യപ്പെട്ടു.