മഹാമാരിക്കാലം ദുരിതം സമ്മാനിച്ച്​ യക്ഷഗാന പാവകളി മ്യൂസിയം

കാസർകോട്: പുതുതലമുറക്ക്​ യക്ഷഗാന പാവകളി പരിശീലനം, പാവനിർമാണ പരിശീലനം, പാവകളി പ്രദർശനം തുടങ്ങിയ ലക്ഷ്യമിട്ട്​ തുടങ്ങിയ യക്ഷഗാന പാവകളി മ്യൂസിയം നിലനിൽപിനായി പൊരുതുന്നു.

യക്ഷഗാന കലാകാരൻ കെ.വി. രമേഷ് ലക്ഷങ്ങൾ ചെലവഴിച്ച്​ തുടങ്ങിയ മ്യൂസിയമാണ്​ മഹാമാരിക്കാലത്ത്​ ദുരിതം പേറുന്നത്​. കോവിഡും അടച്ചിടലും ഇൗ കലാകാര​െൻറ സ്വപ്​നങ്ങൾക്കാണ്​ താഴിട്ടത്​. 2013ൽ കാസർകോട് പുലിക്കുന്നിലെ വീടിനോടു ചേർന്നാണ്​ ഇദ്ദേഹം മ്യൂസിയം ഒരുക്കിയത്. 20 ലക്ഷം രൂപ വായ്​പയെടുത്തും സുഹൃത്തുക്കളിൽനിന്നും ബന്ധുക്കളിൽനിന്നും കടംവാങ്ങിയുമാണ്​ സ്വപ്​നം പൂർത്തീകരിച്ചത്​. നല്ല നിലയിൽ പോയിരുന്ന സ്​ഥാപനം കോവിഡ്​ കാലമെത്തിയതോടെ എല്ലാ കണക്കുകൂട്ടലുകളും തെറ്റിച്ചു. ഇന്ന്​ നിത്യചെലവിനുപോലും വകയില്ലാതെ പ്രയാസപ്പെടുകയാണ്​ ഇൗ മഹദ്​ സംരംഭം.

കടലിനക്ക​രെയെത്തിച്ച പെരുമ

യക്ഷഗാന കല പെരുമ കടലിനരക്കരെയിലേക്കും എത്തിച്ച കലാകാരനാണ് രമേഷ്. 1981ൽ വടകു, തെൻകു തിട്ടുകളിലായി എട്ട്​ യക്ഷഗാന പാവകളി സംഘമാണ് ഉണ്ടായിരുന്നത്. ഇപ്പോൾ അത് രണ്ടെണ്ണം മാത്രമായി മാറി. ഇത്ത​രമൊരു സാഹചര്യം കൂടി മുന്നിൽ കണ്ടാണ്​ ഇൗ കലാരൂപം നിലനിൽക്കാൻ വീടിനോട്​ ചേർന്ന്​ മ്യൂസിയം യാഥാർഥ്യമാക്കിയത്​. 200 പേർക്കുവരെ പ്രദർശനം കാണാനുള്ള സൗകര്യമാണ്​ സംവിധാനിച്ചത്​.

പ്രദർശനം കാണാൻ വിദേശികളുൾപ്പെടെ ഇവിടെയെത്തി. രാമായണം, ഭാഗവതം, മഹാഭാരതം, ദേവിമഹാത്മ്യം തുടങ്ങി പുരാണ കഥാഭാഗങ്ങളിലെ കഥാപാത്രങ്ങളായി 100 പാവകളെ കൊത്തി വച്ചിട്ടുണ്ട് ഇദ്ദേഹവും സംഘവും. തേക്കിൽ ഒരു പാവ തയാറാക്കുന്നതിന്​ 30000 രൂപയാണ് ചെലവ്. ശ്രീരാമ​െൻറ എട്ടും രാവണ​െൻറ ആറും കഥാപാത്രങ്ങളെ ഇങ്ങനെ ഒരുക്കി. പുരാണങ്ങളിലെ മറ്റു കഥാപാത്രങ്ങൾക്കും അദ്ദേഹം ഒരുക്കി.

പ്രതിവർഷം 20 പാവകളി

കോവിഡ് കാലത്തിനു മുമ്പ്​ പ്രതിവർഷം 20 പാവകളി പ്രദർശനം വരെ അവതരിപ്പിച്ചിരുന്നു. സമീപ പ്രദേശങ്ങളിലെ പരിപാടിക്ക് 20,000 രൂപവരെ ലഭിച്ചു.

എല്ലാ ചെലവും കഴിച്ചാലും 5,000 രൂപ വരെ മിച്ചം ലഭിച്ചിരുന്ന കാലമായിരുന്നു അത്​. നല്ല നിലക്ക്​ സംരംഭം മുന്നോട്ടുപോകുന്നതിനിടെയാണ്​ കോവിഡ്​ എത്തുന്നത്​. പിന്നെ കണക്കുകൂട്ടലുകളെല്ലാം തെറ്റി. പാവകളി അവതരണത്തിനു വേദികൾ നഷ്​ടമായി. ഇതോടെ വരുമാനവഴി അടഞ്ഞു. മ്യൂസിയത്തിനുവേണ്ടി എടുത്ത വായ്പ തിരിച്ചടവും മുടങ്ങി. പലിശ കയറി കടം ഇരട്ടിക്കുകയാണ്​.

3000 വേദികളിൽ പ്രദർശനം

രാജ്യത്തിനകത്തും പുറത്തുമായി വിവിധയിടങ്ങളിൽ പ്രദർശനം നടത്തി. വിദേശ രാജ്യങ്ങൾ ഉൾ​െപ്പടെ ഏകദേശം 3000 വേദികളിൽ പാവകളി പ്രദർശനം നടത്തിയിട്ടുണ്ട്​. നരകാസുര വധം, ഗരുഡ ഗർവ ഭംഗം, ദേവി മഹാത്മ്യം, പഞ്ചവടി, ബാലിവധം, ലങ്കാദഹനം തുടങ്ങി 12 കഥാഭാഗങ്ങളാണ് അവതരിപ്പിച്ചിരുന്നത്.

ഒ​േട്ടറെ ബഹുമതികളും കലാകാരനെ തേടിയെത്തി. കെ.വി. രമേഷി​െൻറ നേതൃത്വത്തിലുള്ള പുലിക്കുന്ന് ശ്രീ ഗോപാലകൃഷ്ണ യക്ഷഗാന ബൊംബെയാട്ട സംഘമാണ് തെൻകു തിട്ടുവിൽ നിലവിലുള്ള ഏക യക്ഷഗാന പാവകളി സംഘം. ​​പിതാവ് വെങ്കട കൃഷ്ണയ്യയുടെയും മുത്തച്ഛൻ ലക്ഷ്മി നാരായണയ്യയുടെയും സഹായത്തോടെയാണ് 1981ൽ യക്ഷഗാന പാവകളി പ്രദർശനവുമായി രമേഷ് രംഗത്തു വന്നത്. മഹാമാരിക്കാലം മാറിവരുമെന്ന പ്രതീക്ഷയിൽ തന്നെ ഇദ്ദേഹവും കലാകാരന്മാരും.