കുടിവെള്ള പൈപ്പ്​ അടിക്കടി പൊട്ടുന്നു; പരിഹാരം അകലെ

കാസർകോട്​ നഗരസഭ പരിധിയിൽ 11 ഇടത്താണ്​​ കുടിവെള്ള ചോർച്ച കാസർകോട്: നഗരസഭ പരിധിയിൽ കുടിവെള്ള പൈപ്പുകൾ​ അടിക്കടി പൊട്ടുമ്പോഴും പരിഹാരം ഇനിയുമകലെ. നഗരസഭയിലെ​ 11 ഇടത്തെ​ പൈപ്പുകൾക്കാണ്​ ഇടക്കിടെ​ തകരാറ് വരുന്നത്​​​. അറ്റകുറ്റപ്പണി നടത്താൻ വിവിധ വകുപ്പുകൾ തമ്മിൽ ആശയവിനിമയം നടക്കാൻ തുടങ്ങിയിട്ട്​ കാലങ്ങളായെങ്കിലും ഒന്നും നടക്കുന്നില്ല. ഒടുവിൽ വിഷയം എൻ.എ. നെല്ലിക്കുന്ന്​ എം.എൽ.എ​ നിയമസഭയിലും ഉന്നയിച്ചു. കാസർകോട്​ ഓൾഡ്​ എസ്​.എച്ച്​.ബി.എം.എസിന് സമീപം, ബീച്ച്​ റോഡ്​ ഗീത തിയറ്ററിന് സമീപം, പാ​ങ്ങോട്​, തളങ്കര മുണ്ടപ്പൊതി റോഡ്​, കെ.എസ്​. റാവു റോഡ്​, പുലിക്കുന്ന്​ റോഡ്​, പാങ്ങോട്​ യു.കെ റോഡ്​, മധൂർ റോഡ്​ ചൂരി സുന്നി സെന്‍റർ, നീർച്ചാൽ ബേഡടുക്ക ഷിരി ബാഗിലു റോഡ്​, മധൂർ റോഡ്​ കൂൾബാറിനു സമീപം, ഓൾഡ്​ എസ്​.എച്ച്​. മല്ലികാർജുന ക്ഷേ​​ത്രത്തിനുസമീപം എന്നിവിടങ്ങളിലാണ്​ അടിക്കടി പൈപ്പുകൾ പൊട്ടുന്നത്​. ഈ ഭാഗത്ത്​ അറ്റകുറ്റപ്പണി നടത്തണമെങ്കിൽ റോഡ്​ വെട്ടിപ്പൊളിക്കണം. ഇതിനായി പൊതുമരാമത്ത്​ വകുപ്പ്​, നഗരസഭ സെക്ഷനുകളിൽനിന്ന്​ അനുമതിക്കായി ജല അതോറിറ്റി അപേക്ഷ നൽകിയിട്ടുണ്ട്​. എന്നാൽ, ഇതിനായി മുൻകൂർ തുക അടക്കണം. വെട്ടിപ്പൊളിക്കുന്ന റോഡ്​ പഴയ പടിയാക്കാനും തുകയടക്കണം. ഇത്തരം നിബന്ധനകൾ പാലിക്കാൻ ജല അതോറിറ്റിക്ക്​ നിർവാഹമില്ല. ഇതിനുള്ള ഫണ്ട്​ അതോറിറ്റിക്ക്​ അനുവദിച്ചിട്ടില്ലെന്നാണ്​ ഉദ്യോഗസ്ഥർ പറയുന്നത്​. ജല അതോറിറ്റി, പൊതുമരാമത്ത്​, നഗരസഭ എന്നിവ സംയുക്​തമായി തീരുമാനത്തിലെത്താൻ കഴിയാത്തതിനാൽ പൈപ്പ്​ പൊട്ടലും താൽക്കാലിക അറ്റകുറ്റപ്പണിയും മാത്രമാണ്​ നടക്കുന്നത്​. ബാവിക്കരയിലെ ജലസംഭരണിയിൽനിന്നാണ്​ നഗരത്തിലെ ആയിരക്കണക്കിന്​ കുടുംബങ്ങൾ ഉൾപ്പെടെയുള്ളവർക്ക്​ കുടിവെള്ളമെത്തുന്നത്​. നാലര പതിറ്റാണ്ടോളം പഴക്കമുള്ള പൈപ്പുകളാണിവ. ഇത് മാറ്റിസ്ഥാപിക്കുകയാണ്​ പരിഹാരമെങ്കിലും അത്തരമൊരു ശ്രമം ഇപ്പോഴില്ല. പൈപ്പുകൾ മുഴുവൻ മാറ്റി പുതിയത്​ സ്ഥാപിച്ചുള്ള ബൃഹദ്​ പദ്ധതി അമൃത്​ പദ്ധതിയിൽ ലഭ്യമാക്കാനുള്ള ശ്രമമാണ്​ ജലവിഭവവകുപ്പിന്‍റെ ശ്രമം. ഇതിനായി പദ്ധതി റിപ്പോർട്ട്​ തയാറാക്കുന്നതായി മന്ത്രി റോഷി അഗസ്റ്റിൻ എൻ.​എ. നെല്ലിക്കുന്നിനെ അറിയിച്ചു.