എ.ആർ നഗർ ബാങ്ക് തട്ടിപ്പ്: അംഗൻവാടി അധ്യാപിക അറിയാതെ അക്കൗണ്ടിലൂടെ 80 ലക്ഷത്തി​െൻറ തിരിമറി

തിരൂരങ്ങാടി (മലപ്പുറം): എ.ആർ നഗർ സഹകരണ ബാങ്ക് തട്ടിപ്പിലെ കൂടുതൽ വിവരങ്ങൾ പുറത്ത്. ഇടപാടുകാരറിയാതെ അവരുടെ അക്കൗണ്ടുകൾ വഴി ലക്ഷങ്ങളുടെ പണമിടപാട് ബാങ്ക് നടത്തി എന്നാണ് വിവരം. കണ്ണമംഗലം സ്വദേശിനിയായ അംഗൻവാടി അധ്യാപികയുടെ അക്കൗണ്ടിലൂടെ തിരിമറി നടത്തിയത്​ 80 ലക്ഷം രൂപയാണെന്നാണ് റിപ്പോർട്ട്.

ആദായ നികുതി വകുപ്പി​െൻറ നോട്ടീസ് കിട്ടിയപ്പോഴാണ് ഇങ്ങനെ അക്കൗണ്ട് വഴി പണം കൈമാറിയതായി അധ്യാപിക അറിഞ്ഞത്. തട്ടിപ്പിന് ഇരയായതായി തിരിച്ചറിഞ്ഞതിനെ തുടർന്ന് ഇവർ തിരൂരങ്ങാടി പൊലീസിൽ പരാതി നൽകി. പരാതി ലഭിച്ചെന്നും വിവരം ആദായ നികുതി വകുപ്പിനെ അറിയിക്കുമെന്നും തിരൂരങ്ങാടി എസ്.ഐ എസ്​.കെ. പ്രിയൻ പറഞ്ഞു.

എ.ആർ നഗർ സർവിസ് സഹകരണ ബാങ്കിലെ സാമ്പത്തിക ക്രമക്കേടുകളുമായി ബന്ധപ്പെട്ടു 183 അക്കൗണ്ടുകളിലായി 110 കോടിയോളം രൂപ ആദായനികുതി വകുപ്പ് മരവിപ്പിച്ചിട്ടുണ്ട്​.