''വിദ്വേഷം ഇന്ധനമാക്കി ബി.ജെ.പിയുടെ ബുൾഡോസറുകൾ'' ബുൾഡോസറിനെതിരെ രാഹുൽ; ന്യായീകരിച്ച്​ ബി.ജെ.പി മന്ത്രി

ന്യൂഡൽഹി: വിദ്വേഷം ഇന്ധനമാക്കിയ ബുൾഡോസറുകളാണ്​ ബി.ജെ.പിയു​ടേതെന്ന കോൺഗ്രസ്​ നേതാവ്​ രാഹുൽ ഗാന്ധി. മധ്യപ്രദേശിൽ രാമനവമി ആഘോഷത്തിനിടയിലെ അക്രമങ്ങൾക്ക്​ പിന്നാലെ മധ്യപ്രദേശിലെ ബി.ജെ.പി സർക്കാർ മുസ്ലിംകളുടെ ഭവനങ്ങളും കെട്ടിടങ്ങളും ബുൾഡോസറുകൾ തെര​ഞ്ഞുപിടിച്ച്​ ഉപയോഗിച്ച്​ തകർത്തതിന്‍റെ പശ്ചാത്തലത്തിലാണ്​ ട്വിറ്ററിൽ വിമർശനവുമായി രാഹുൽ രംഗത്തുവന്നത്​. അതേ സമയം മുസ്​ലിംകൾക്കെതിരെ ഏകപക്ഷീയമായി നടത്തിയ ബുൾഡോസർ ആക്രമണത്തെ മധ്യപ്രദേശ്​ ആഭ്യന്തര മന്ത്രി ന്യായീകരിച്ചു.

വിലക്കയറ്റവും തൊഴിലില്ലായ്മയും രാജ്യ​ത്തെ ജനങ്ങളെ ശ്വാസം മുട്ടിക്കുകയാണെന്നും ജനങ്ങളുടെ ഇത്തരം പ്രശ്നങ്ങൾക്ക്​ മേലാണ്​ സർക്കാർ ബുൾഡോസർ കയറ്റേ​ണ്ടതെന്നും രാഹുൽ ഗാന്ധി പറഞ്ഞു. എന്നാൽ വിദ്വേഷവും പരി​ഭ്രാന്തിയും നിറഞ്ഞതാണ്​ ബി.ജെ.പിയുടെ ബുൾഡോസറുകളെന്ന്​ രാഹുൽ കുറ്റപ്പെടുത്തി.

എന്നാൽ അക്രമത്തിലെ പങ്കാളികൾ എന്ന്​ പൊലീസ്​ ആരോപിക്കുന്നവർ കുറ്റക്കാരാണെന്ന്​ കോടതി പറയുന്നതിന്​ മുമ്പ്​ കുറ്റവാളികളായി പ്രഖ്യാപിച്ച്​ തങ്ങൾക്ക്​ തോന്നിയ ശിക്ഷ നടപ്പാക്കുന്നതിനെ മധ്യപ്രദേശ്​ ആഭ്യന്തര മന്ത്രി നിരോത്തം മിശ്ര ന്യായീകരിച്ചു.

അക്രമത്തിൽ പങ്കുണ്ടെന്ന്​ പ്രഥമദൃ​ഷ്​ട്യാ കണ്ടെത്തിയവരുടെ വീടുകളാണ്​ തകർത്തതെന്നാണ്​ മിശ്രയുടെ അവകാശവാദം​. പ്രാഥമികമായ അന്വേഷണമോ കോടതിയുടെ നി​ർദേശമോ ഇല്ലാതെ നിയമം കൈയിലെടുക്കുന്ന യു.പിയിലെ രീതി നിയമസഭാ തെരഞ്ഞെടുപ്പ്​ അടുത്ത വേളയിൽ മധ്യപ്രദേശി​ലേക്കും വ്യാപിപ്പിച്ചത്​ വിവാദമായതോടെയാണ്​ മന്ത്രിയുടെ പ്രതികരണം. ഖർഗോൻ ജില്ലയിൽ രാമനവമി ഘോഷയാത്രക്ക്​ നേരെ കല്ലെറിഞ്ഞവരുടെ വീടുകളാണ്​ തകർത്തതെന്ന്​ മന്ത്രി അവകാ​ശപ്പെട്ടു.

'കുറ്റാരോപിതൻ, കുറ്റവാളി' എന്നൊരു പ്രശ്നം ഈ വിഷയത്തിൽ ഉൽഭവിക്കുന്നില്ലെന്നും ദൃശ്യങ്ങളിലുള്ളവർ കുറ്റാരോപിതർ ആകുന്നത്​ എങ്ങിനെയാണെന്നും മന്ത്രി ചോദിച്ചു. ദൃശ്യങ്ങളിലും വീഡിയോകളിലും കല്ലെറിയുന്നതായി കാണുന്നവരെയും കുറ്റാരോപിതർ എന്നാണ്​ പറയുകയെന്ന്​ മന്ത്രി ചോദിച്ചു. അവർ കുറ്റക്കാരാണെന്ന്​ പറയുന്നതിന്​ നിയമ പ്ര​ക്രിയ ഇല്ലേ എന്ന ചോദ്യത്തിന്​ അവരെ ജയിലിൽ അയക്കുന്നതിനുള്ള പ്രക്രിയ നടക്കുന്നുണ്ട​ല്ലോ എന്നാണ്​ മന്ത്രി മറുപടി നൽകിയത്​. പ്രതികൾ ജയിലിൽ പോകും അതിക്രമം നടത്തിയവരുടെ വീടുകൾ തകർക്കും.

വീട്ടിലൊരാൾ പ്രതിയെന്ന്​ കരുതി അയാളുടെ മാതാപിതാക്കളും മകക്കളുമൊക്കെ കഴിയുന്ന വീട്​ തകർക്കേണ്ടതുണ്ടോ എന്ന്​ ചോദിച്ചപ്പോൾ വെടിയേറ്റവരും മാതാപിതാക്കളും മക്കളും ഉണ്ടെന്ന്​ മന്ത്രി പ്രതികരിച്ചു. കല്ലെറികയുകയും വാളും തോക്കും എടുക്കുകയും ചെയ്യുന്നതിനെ കുറിച്ച്​ മാധ്യമങ്ങൾ ഒന്നും ചോദിക്കുകയോ പറയുകയോ ചെയ്യുന്നി​ല്ലെന്നും മന്ത്രി കൂട്ടിച്ചേർത്തു.

വീട്​ തകർക്കുന്നത്​ കുറ്റം തെളിയിച്ച ശേഷമാണ്​ വീടുകൾ തകർക്കുന്നതെന്ന്​ ആവർത്തിച്ച മന്ത്രി അന്വേഷണം തുടരുകയാണെന്നും 94 പേരെ ഇതിനകം അറസ്റ്റ്​ ​െചയ്തുവെന്നും കൂട്ടിച്ചേർത്തു.