ചന്ദൗലി: ഉത്തർ പ്രദേശിലെ ചന്ദൗലി ജില്ലയിൽ സ്വകാര്യ ആശുപത്രിക്ക് സമീപം ഓക്സിജൻ സിലിണ്ടർ പൊട്ടിത്തെറിച്ച് രണ്ട് മരണം. മുഗൽസരായിയിലെ രവിനഗർ മേഖലയിലുള്ള ദയാൽ ആശുപത്രിക്ക് പുറത്താണ് സ്ഫോടനമുണ്ടായത്. രാവിലെ ഒമ്പതിനും 9.30നും ഇടയിലായിരുന്നു സംഭവം. ആശുപത്രിക്ക് സമീപം നിർത്തിയിട്ട ട്രക്കിൽ നിന്ന് ഓക്സിജൻ സിലിണ്ടറുകൾ ഇറക്കുന്നതിനിടെയാണ് സ്ഫോടനമുണ്ടായത്.
ശക്തമായ സ്ഫോടനം സമീപത്തെ വീടുകളെയും കുലുക്കി. ആശുപത്രിയുടെയും സമീപത്തെ വീടുകളുടെയും ജനൽ ചില്ലുകൾ പൊട്ടി. സ്ഫോടനത്തിൽ മരിച്ച രണ്ടുപേരുടയും ശരീരം ചിന്നിത്തെറിച്ചു. അഗ്നി രക്ഷാ സേന ഉടൻ സ്ഥലത്തെത്തി രക്ഷാ പ്രവർത്തനം തുടങ്ങി.
പ്രദേശിക പൊലീസും മുഗൽസരായി എം.എൽ.എയും ഉടൻ സംഭവസ്ഥലത്തെത്തി. മരിച്ചവരുടെ ശരീരഭാഗങ്ങൾ പൊലീസ് പോസ്റ്റ് മോർട്ടത്തിനയച്ചു. സ്ഫോടനം നടന്ന സ്ഥലത്തിന് സമീപത്തുള്ള സുരക്ഷാ ക്യാമറകൾ പൊലീസ് പരിശോധിക്കുന്നുണ്ട്.
ഓക്സിജൻ സിലിണ്ടർ വിതരണം ചെയ്യുന്ന കമ്പനിയുടെ ജോലിക്കാരാണ് മരിച്ചത്. സിലിണ്ടറിൽ ഓക്സിജൻ നിറച്ചത് ശരിയായ വിധത്തിലാണോ എന്ന കാര്യം പൊലീസ് അന്വേഷിക്കുന്നുണ്ട്.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.