തിരക്കേറിയ ജീവിതശൈലി പിന്തുടരുന്ന ഒരു ലോകത്താണ് നമ്മൾ ജീവിക്കുന്നത്. സർവ്വവും ഡിജിറ്റലായ ആധുനിക യുഗത്തിലെ ഏറ്റവും സാധാരണമായ വെല്ലുവിളികളിൽ ഒന്നാണ് സമ്മർദ്ദം. ഈ വർഷം നവംബർ മൂന്ന് മുതൽ ഏഴ് വരെയാണ് അന്താരാഷ്ട്ര സമ്മർദ്ദ അവബോധ വാരമായി ആചരിക്കുന്നത്.
നമ്മുടെ മാനസിക ക്ഷേമം നിലർത്താനും പരിപാലിക്കാനുമുള്ള ഒരു ആഗോള ഓർമ്മപ്പെടുത്തലായി ഈ വാരാചരണം വർത്തിക്കുന്നു. സമ്മർദ്ദത്തെ ചുറ്റിപ്പറ്റിയുള്ള മുൻവിധികൾ വെടിഞ്ഞ് മാനസികാരോഗ്യത്തെക്കുറിച്ച് സംസാരിക്കുക എന്നതാണ് ലക്ഷ്യം.
ജീവിതത്തിലെ വെല്ലുവിളികളോടുള്ള ശരീരത്തിന്റെ പ്രതികരണമാണ് സമ്മർദ്ദം. ഇത് ശാരീരിക മാനസിക വൈകാരിക പ്രതികരണങ്ങൾ സൃഷ്ടിക്കുന്നു. ഒരു പരിദ്ധി വരെയുള്ള സമ്മർദ്ദം ആരോഗ്യകരമാണ്. ലക്ഷ്യങ്ങൾ കൈവരിക്കാനും മികച്ച പ്രകടനം കാഴ്ചവയ്ക്കാനും ജാഗ്രത പാലിക്കാനും അത് നമ്മെ പ്രേരിപ്പിക്കുന്നു.
എന്നാൽ നിയന്ത്രണാതീതവും പതിവായി അനുഭവപ്പെടുകയും ചെയ്യുന്ന സമ്മർദ്ദം മനസ്സിനെയും ശരീരത്തെയും ബാധിക്കാൻ തുടങ്ങും. ക്ഷീണം, ഉറക്ക പ്രശ്നങ്ങൾ, മാനസികാവസ്ഥയിലെ മാറ്റങ്ങൾ, ഏകാഗ്രത നഷ്ടപ്പെടൽ, തലവേദന, ഉത്കണ്ഠ എന്നിവയാണ് സാധാരണ ലക്ഷണങ്ങൾ. വിട്ടുമാറാത്ത സമ്മർദ്ദം കാലക്രമേണ ഉയർന്ന രക്തസമ്മർദ്ദം, ഹൃദ്രോഗം, വിഷാദം തുടങ്ങിയ ഗുരുതരമായ ആരോഗ്യ പ്രശ്നങ്ങൾക്ക് കാരണമാകും.
അക്കാദമിക് സമ്മർദ്ദം, ജോലി സമ്മർദ്ദം, സാമ്പത്തിക ആശങ്കകൾ, കുടുംബ ഉത്തരവാദിത്തങ്ങൾ തുടങ്ങിയ കാരണങ്ങൾ പ്രായഭേദമന്യേ പലരെയും സമ്മർദ്ദത്തിലാക്കുന്നു. ഉറങ്ങുന്നതിലോ ശ്രദ്ധ കേന്ദ്രീകരിക്കുന്നതിലോ ബുദ്ധിമുട്ട്, കഴുത്ത് വേദന, നടുവേദന, തലവേദന, വൈകാരിക ക്ഷോഭം, പതിവ് ഉത്കണ്ഠ, ഭക്ഷണശീലങ്ങളിലെ മാറ്റങ്ങൾ തുടങ്ങിയവ നിങ്ങൾക്ക് സമ്മർദ്ദം ഉണ്ട് എന്നതിന്റെ ലക്ഷണങ്ങളാവാം. ഇവയെ കുറിച്ച് നേരത്തെ അറിയുന്നത് വേഗത്തിലുള്ള രോഗ മുക്തിക്ക് സഹായിക്കും.
സമ്മർദ്ദം ജീവിതത്തിന്റെ ഒരു ഭാഗമാണ്. പക്ഷേ അത് ഒരിക്കലും നമ്മുടെ ശാരീരിക വൈകാരിക ആരോഗ്യത്തെ നിയന്ത്രിക്കുന്ന അവസ്ഥ ഉണ്ടാകരുത്.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.