മനുഷ്യനും ഭൂമിക്കും വേണ്ടി, മാറ്റത്തിന്​ പ്രചോദനമേകാൻ എക്​സ്​പോ

ദുബൈ: ഒാരോ സന്ദർശകനെയും മാറ്റത്തി​െൻറ വാഹകരാകാൻ പ്രേരിപ്പിക്കുന്ന പരിപാടികളുടെയും അനുഭവങ്ങളുടെയും പട്ടികയടങ്ങിയ എക്​സ്​പോ കലണ്ടർ പുറത്തിറക്കി.

മനുഷ്യനും ഭൂമിക്കും വേണ്ടിയുള്ള പരിപാടി എന്ന തലക്കെട്ടിലാണ്​ ആറുമാസം നീളുന്ന കലണ്ടർ പുറത്തിറക്കിയത്​. ഭൂമിയിലെ മുഴുവൻ മനുഷ്യരും അനുഭവിക്കുന്ന വെല്ലുവിളികളിലേക്കും അവസരങ്ങളിലേക്കും വെളിച്ചംവീശുന്നതും എക്​സ്​പോയിലെത്തുന്നവർക്ക്​ മാറ്റത്തിന്​ പ്രചോദനം പകരുന്നതായിരിക്കും പരിപാടികളെന്നാണ്​ അവകാശപ്പെടുന്നത്​.

എക്സ്പോ ദുബൈയുടെ പൈതൃകം രൂപപ്പെടുത്തുമെന്നും വരുംതലമുറകൾക്ക് അർഥവത്തായ പ്രചോദനം നൽകുന്ന ചലനത്തിന് തുടക്കംകുറിക്കുമെന്നും പരിപാടിയുടെ ചീഫ്​ ഓഫ്​ സ്​റ്റാഫ്​ നാദിയ വെർജീ പറഞ്ഞു.

ചിന്തകളുടെ പങ്കുവെക്കൽ, സംഭാഷണങ്ങൾ, വർക്​ഷോപ്പുകൾ, തമാശകളടങ്ങിയ ഗെയിമുകൾ എന്നിവയിലൂടെ വലിയ ചോദ്യങ്ങൾ ഉയർത്തുകയും പരിഹാരങ്ങൾ തേടുകയും ചെയ്യും. ഭൂമിയെയും ജൈവവൈവിധ്യങ്ങളെയും നിലനിർത്തുന്ന ആലോചനകൾ, എല്ലാവർക്കും ആരോഗ്യവും വിദ്യാഭ്യാസവും ലഭ്യമാക്കാനുള്ള ചിന്തകൾ, മനുഷ്യജീവിതത്തിന്​ സുസ്​ഥിരത കൈവരിക്കാനുള്ള സംഭാഷണങ്ങൾ എല്ലാം അടങ്ങിയതായിരിക്കും പരിപാടി. 'മനസ്സുകളെ ഇണക്കി, ഭാവിസൃഷ്​ടിക്കാം' എന്ന എക്​സ്​പോയുടെ തീമിനെ അടിസ്​ഥാനമാക്കിയാണ്​ പരിപാടിയെന്നും നാദിയ വെർജീ പറഞ്ഞു.

മനുഷ്യനും ഭൂമിക്കും വേണ്ടിയുള്ള പരിപാടികൾ അഞ്ചു 'പാത'കളിലായാണ്​ വിന്യസിച്ചിരിക്കുന്നത്​.'പാലങ്ങൾ പണിയുക' എന്ന തീമിലാണ്​ കൾചറൽ ട്രാക്ക്​. കല, സംഗീതം, മറ്റു സാംസ്​കാരിക പരിപാടികൾ എന്നിവയിലൂടെ പരസ്​പര സംഭാഷണവും വിജ്ഞാനവിനിമയവും വളർത്തിയെടുക്കുകയും അതിരുകൾ തകർത്ത്​ ബന്ധങ്ങൾ സൃഷ്​ടിക്കുകയുമാണ്​ ഇതിലൂടെ ഉദ്ദേശിക്കുന്നത്​.

'ആരും പിന്നിലാകരുത്​' എന്ന തീമിലെ സാമൂഹിക വികസന ​ട്രാക്കിൽ സാമൂഹിക സമത്വത്തിനാണ്​ ഊന്നൽനൽകുന്നത്​. 'സന്തുലിതമായി ജീവിക്കുക' എന്ന തീമിൽ ആഗോളതാപനമടക്കം പരിസ്​ഥിതിവിഷയങ്ങൾ ചർച്ചക്കെടുക്കുന്നു. 'ഒരുമിച്ച്​ അതിജീവിക്കുക' എന്ന തലക്കെട്ടിലെ ട്രാക്കിലൂടെ അവസരങ്ങൾ എല്ലാവർക്കും ലഭ്യമാവുക എന്ന ആശയത്തെ മുന്നോട്ടുവെക്കുന്നു. 'വിഷൻ 2071' എന്ന അവസാന ട്രാക്കിലൂടെ ഭാവിലോകത്തെ വിഭാവനം​​ ചെയ്യുന്നു.