സൗദി സമ്പന്നതയുടെ ആദ്യ ഉറവകൾ കണ്ടെത്തിയിട്ട്​ എൺപതാണ്ട്​

റിയാദ്​: സൗദി അറേബ്യയിലെ ആദ്യ എണ്ണക്കിണർ കണ്ടെത്തിയിട്ട്​ എൺപത്​ വർഷം പൂർത്തിയായി. 1938 മാർച്ച്​ നാലിനായിരുന്നു രാജ്യത്തെ സമ്പന്നതയിലേക്ക്​ കൈപിടിച്ചുയർത്തിയ എണ്ണ സമ്പത്തി​​​െൻറ ആദ്യ ഉറവകൾ കണ്ടെത്തിയത്​.  ‘ദമ്മാം നമ്പർ 7’  എന്ന പേരിലാണ്​  ഇൗ എണ്ണക്കിണർ അറിയപ്പെടുന്നത്​. മരുഭൂമിയുടെ മർമമറിയുന്ന ബിദുനി ഗോത്രത്തിൽപെട്ട ഖമിസ്​ ബിൻ റിംതാൻ എന്ന ഗ്രാമീണനാണ്​ ​ ചരിത്രം രേഖ​പ്പെടുത്തിയ കണ്ടുപിടിത്തത്തിന്​ മുഖ്യ പങ്കുവഹിച്ചത്​. പ്രശസ്​ത അമേരിക്കൻ ജിയോളജിസ്​റ്റായ മാക്​സ്​ സ്​റ്റെയിൻകിയുടെ സഹായിയായാണ്​ റിംതാൻ പ്രവർത്തിച്ചത്​. സൗദിയിലെ എണ്ണക്കിണർ പര്യവേക്ഷണ വിജയത്തി​​​െൻറ കീർത്തി സ്​റ്റെയിൻസ്​കിക്കാണെങ്കിലും ഇതിൽ മുഖ്യപങ്കുവഹിച്ചത്​ റിംതാനായിരുന്നു.

മരുഭൂപര്യവേക്ഷണത്തിൽ വിദഗ്​ധനായിരുന്ന റിംതാ​​​െൻറ സഹായം മാക്​സ്​ സ്​റ്റെയിൻകിക്ക്​ ലഭ്യമാക്കിയത്​ അന്നത്തെ കിഴക്കൻ പ്രവിശ്യ ഗവർണർ അബ്​ദുല്ല ബിൻ ജലവിയുടെ നിർദേശത്തെ തുടർന്നായിരുന്നു. കാലിഫോർണിയ അറേബ്യൻ സ്​റ്റാൻഡേർഡ്​ ഒായിൽ കമ്പനി (ഇന്നത്തെ അരാംകോ) ചീഫ്​ ജിയോളജിസ്​റ്റ്​ സ്​റ്റെയിൻസ്​കിയെ സഹായിക്കാൻ ആ​െള വേണമെന്ന്​ കമ്പനി സൗദി അറേബ്യയോട്​ ആവശ്യപ്പെടുകയായിരുന്നു.  മരുഭൂമിയിൽ പര്യവേക്ഷണം നടത്തുന്നതിൽ നിപുണനായിരുന്നു റിംതാൻ. ആദ്യ എണ്ണക്കിണർ കൃത്യമായി അടയാളപ്പെടുത്തിക്കൊടുത്തത്​ റിംതാനായിരുന്നു എന്ന്​ അമേരിക്കയിലെ ജിയോളജിസ്​റ്റ്​ തോമസ്​ ബാർഗറി​​​െൻറ ‘ഒൗട്ട്​ ഇൻ ദ ബ്ലു’ എന്ന പുസ്​തകത്തിൽ രേഖപ്പെടുത്തിയിട്ടുണ്ട്​. റിംതാ​​​െൻറ നൈപുണ്യം അമേരിക്കക്കാരിൽ വലിയ മതിപ്പുളവാക്കിയതായി പുസ്​തകം പറയുന്നു. മരുഭൂമിയിലെ മണൽമലകൾ  അപ്രത്യക്ഷമായി പകരം രൂപപ്പെടുന്ന വൃത്താകൃതിയിലുള്ള ഗർത്തം എണ്ണക്കിണറി​​​െൻറ അടയാളമാണെന്ന്​ റിംതാനാണ്​ ജിയോളജിസ്​റ്റുകൾക്ക്​ പറഞ്ഞുകൊടുത്തത്​. 

ഇദ്ദേഹം പറഞ്ഞതി​​​െൻറ അടിസ്​ഥാനത്തിൽ നടത്തിയ ഖനനത്തിലാണ്​ ആദ്യ എണ്ണക്കിണർ കണ്ടെത്തിയത്​. 1959 ൽ അരാംകോ ഹോസ്​പിറ്റലിലായിരുന്നു​ റിംതാ​​​െൻറ മരണം.1933 ലാണ്​ സൗദി അറേബ്യ എണ്ണ പര്യവേക്ഷണത്തിന്​ അമേരിക്കയിലെ സ്​റ്റാൻഡേർഡ്​ ഒായിൽ ഒാഫ്​ കാലിഫോർണിയ എന്ന കമ്പനിക്ക്​ അനുമതി നൽകിയത്​. ഇതി​​​െൻറ കീഴിലാണ്​ കാലിഫോർണിയ അറേബ്യ സ്​റ്റാൻഡേർഡ്​ ഒായിൽ കമ്പനി രൂപവത്​കരിച്ചത്. അത്​ പിന്നീട്​  അരാംകോ ആയി.