ദോഹ പൊഡാർ പേൾ സ്കൂൾ മൾട്ടിപർപ്പസ് സ്പോർട്സ് കോംപ്ലക്സിന്റെ ശിലാസ്ഥാപനം ഇന്ത്യൻ അംബാസഡർ ഡോ. ദീപക് മിത്തൽ നിർവഹിച്ചപ്പോൾ. ലുലു ഗ്രൂപ് ഡയറക്ടർ ഡോ. മുഹമ്മദ്
അൽതാഫ്, സ്കൂൾ പ്രസിഡന്റ് സാം മാത്യു, പൊഡാർ എജുക്കേഷൻ ഗ്രൂപ് ഡയറക്ടർ ഹർഷ് പവൻ പൊഡാർ എന്നിവർ സമീപം
ദോഹ: ഖത്തറിലെ പ്രമുഖ ഇന്ത്യൻ സ്കൂളായ പൊഡാർ പേൾ സ്കൂളിന്റെ മൾട്ടിപർപ്പസ് സ്പോർട്സ് കോംപ്ലക്സിന്റെ ശിലാസ്ഥാപനം നിർവഹിച്ചു. ശനിയാഴ്ച വൈകീട്ട് അൽ മിഷാഫ് കാമ്പസിൽ നടന്ന പ്രൗഢഗംഭീരമായ ചടങ്ങിൽ ഇന്ത്യൻ അംബാസഡർ ഡോ. ദീപക് മിത്തലാണ് ശിലയിട്ടത്. ചടങ്ങിൽ ഇന്ത്യയിലെ പ്രശസ്ത സ്കൂൾ ശൃംഖലകളുടെ ഉടമസ്ഥരായ പൊഡാർ എജുക്കേഷൻ നെറ്റ്വർക്കുമായി പങ്കാളിത്ത കരാറിലും ഒപ്പുവെച്ചു.
എല്ലാ വിദ്യാർഥികൾക്കും, ഖത്തറിലെ ഇന്ത്യൻ സമൂഹത്തിനും പേൾ സ്കൂളിലെ മൾട്ടിപർപ്പസ് സ്പോർട്സ് സെന്റർ കായിക മികവിന് വഴിയൊരുക്കുമെന്ന് അംബാസഡർ പറഞ്ഞു. അത്യാധുനിക സൗകര്യങ്ങളും മികച്ച പഠനനിലവാരവും പുലർത്തുന്ന സ്ഥാപനത്തിൽനിന്നും പഠിച്ചിറങ്ങുന്ന ഓരോ വിദ്യാർഥിയും ഭാവിയിൽ ലോകത്തിന് മുന്നിൽ രാജ്യത്തിന്റെ അംബാസഡർമാരായി മാറും. മികച്ച വിദ്യാഭ്യാസത്തിലൂടെ അവർ കരുത്തരാകുമെന്നും അംബാസഡർ പറഞ്ഞു.
ഒമ്പതു പതിറ്റാണ്ടിലേറെ പ്രവർത്തന പാരമ്പര്യവും, ഇന്ത്യയിൽ 10 സംസ്ഥാനങ്ങളിലായി 136 സ്കൂളുകളുമുള്ള പൊഡാർ എജുക്കേഷൻ നെറ്റ്വർക്കിന്റെ സഹകരണത്തോടെയാവും പൊഡാർ പേൾ സ്കൂൾ പ്രവർത്തിക്കുക. പങ്കാളിത്ത കരാറിൽ പൊഡാർ എജുക്കേഷൻ നെറ്റ്വർക് ഡയറക്ടർ ഹർഷ് പവൻ പൊഡാറും, പൊഡാർ പേൾ സ്കൂൾ പ്രസിഡന്റ് സാം മാത്യുവും ഒപ്പുവെച്ചു. 1927ൽ രാഷ്ട്രപിതാവ് മഹാത്മാ ഗാന്ധി പ്രഥമ പ്രസിഡന്റായി പ്രവർത്തനമാരംഭിച്ച സ്ഥാപനമാണ് പൊഡാർ എജുക്കേഷൻ ഗ്രൂപ്. ഗ്രൂപ്പിന്റെ അക്കാദമിക്, മാനേജ്മെന്റ് സഹകരണത്തിൽ 80ഓളം സ്കൂളുകൾ വേറെയും പ്രവർത്തിക്കുന്നു. ഇന്ത്യക്ക് പുറത്ത് ആദ്യമായാണ് ഗ്രൂപ് വിദ്യാഭ്യാസ മേഖലയിൽ കൈകോർക്കുന്നത്. സ്കൂളിനുള്ള ഐ.എസ്.ഒ സർട്ടിഫിക്കറ്റ് പ്രസിഡന്റ് സാം മാത്യു ഏറ്റുവാങ്ങി.
സ്കൂൾ പാട്രൺ ഹസൻ ബിൻ അബ്ദുല്ല ആൽഥാനി, ലുലു ഗ്രൂപ് ഡയറക്ടർ ഡോ. മുഹമ്മദ് അൽതാഫ്, ഹസൻ ചൗെഗ്ല തുടങ്ങിയവർ പങ്കെടുത്തു. സ്കൂൾ പ്രിൻസിപ്പൽ മഞ്ജരി റെക്രിവാൾ പരിപാടി നിയന്ത്രിച്ചു. വിദ്യാർഥികളുടെ വിവിധ കലാപരിപാടികളും അരങ്ങേറി.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.