ദോഹ: ഇന്ത്യയുടെ 77ാമത് റിപ്പബ്ലിക് ദിനാഘോഷങ്ങൾ ദോഹയിലെ ഇന്ത്യൻ എംബസിയുടെ നേതൃത്വത്തിൽ ഇന്ന് രാവിലെ 6.30ന് അൽ മമൂറയിലെ ഇന്ത്യൻ കൾചറൽ സെന്ററിൽ (ഐ.സി.സി) നടക്കും. രാജ്യത്തിന്റെ ഐക്യം, ദേശീയ അഭിമാനം, സാംസ്കാരിക പൈതൃകം എന്നിവ പ്രോത്സാഹിപ്പിക്കുന്നതിനായി വിവിധങ്ങളായ പരിപാടികളാണ് ഐ.സി.സിയുടെ നേതൃത്വത്തിൽ ഒരുക്കിയിട്ടുള്ളത്. രാവിലെ ഇന്ത്യൻ അംബാസഡർ വിപുൽ പതാക ഉയർത്തുന്നതോടെ പരിപാടികൾ ആരംഭിക്കും.
തുടർന്ന് ഐ.സി.സി ഒരുക്കുന്ന കൾചറൽ പരിപാടികളും നടക്കും. ഖത്തറിലെ ഇന്ത്യൻ പ്രവാസികളെ ഒരുമിച്ച് കൊണ്ടുവരുന്ന റിപ്പബ്ലിക് ദിനാഘോഷ പരിപാടിയിൽ രാജ്യത്തിന്റെ ജനാധിപത്യ മൂല്യങ്ങൾ ആഘോഷിക്കുന്ന കലാപരിപാടികളായിരിക്കും നടക്കുക. പരിപാടികളിൽ പങ്കെടുക്കുന്നവർക്കായി പ്രഭാത ഭക്ഷണവും ഒരുക്കിയിട്ടുണ്ട്. പരിപാടിയിലേക്ക് ഖത്തറിലെ എല്ലാ ഇന്ത്യക്കാരെയും സ്നേഹപൂർവം ക്ഷണിക്കുന്നതായി ഇന്ത്യൻ എംബസി അധികൃതർ അറിയിച്ചു.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.