മസ്കത്ത്: ഒമാനിൽ സോഷ്യൽ മീഡിയ പ്ലാറ്റ്ഫോമുകളിലൂടെയോ മറ്റ് മാധ്യമങ്ങളിലൂടെയോ ഭക്ഷ്യോൽപന്നങ്ങൾ പരസ്യം ചെയ്യുന്നതിനും പ്രൊമോട്ട് ചെയ്യുന്നതിനും മുൻകൂർ അനുമതി വാങ്ങണമെന്ന് ഫുഡ് സേഫ്റ്റി ആൻഡ് ക്വാളിറ്റി സെന്ററിന്റെ (എഫ്.എസ്.ക്യു.സി) കർശന നിർദേശം.
സോഷ്യൽ മീഡിയ ഇൻഫ്ലുവൻസർമാർ,കണ്ടന്റ് ക്രിയേറ്റേഴ്സ്, കമ്പനികൾ, ഭക്ഷണ വിൽപനക്കാർ എന്നിവരുൾപ്പെടെയുള്ളവർക്ക് ഈ നിയമം ബാധകമാണ്. ഭക്ഷ്യവസ്തുക്കളുടെ രജിസ്ട്രേഷനും അവയുടെ പരസ്യ പ്രൊമോഷനുകളും സംബന്ധിച്ച ഭക്ഷ്യ സുരക്ഷാ നിയമത്തിലെ വ്യവസ്ഥകളുടെയും മന്ത്രാലയത്തിന്റെ പ്രത്യേക ഉത്തരവിന്റെയും (69/2024) അടിസ്ഥാനത്തിലാണ് ഈ നടപടിയെന്ന് അധികൃതർ വ്യക്തമാക്കി.
ഭക്ഷ്യോൽപന്നങ്ങൾ കൈകാര്യം ചെയ്യുന്നവർ, കമ്പനികൾ, സ്ഥാപനങ്ങൾ, പരസ്യ ഏജൻസികൾ, ഇൻഫ്ലുവൻസർമാർ എന്നിവരുൾപ്പെടെ ഭക്ഷ്യോൽപന്ന പരസ്യങ്ങളുമായി ബന്ധപ്പെട്ട് പ്രവർത്തിക്കുന്ന എല്ലാ വിഭാഗങ്ങൾക്കും ഈ നിർദേശം ബാധകമായിരിക്കും.
ഭക്ഷ്യോൽപന്ന പരസ്യങ്ങൾ നൽകുന്നതുമായി ബന്ധപ്പെട്ട് നിലവിലുള്ള നിയമങ്ങളും നിയന്ത്രണങ്ങളും ലംഘിക്കുന്നവർക്കെതിരെ കർശനമായ നിയമനടപടികൾ സ്വീകരിക്കുമെന്നും ഫുഡ് സേഫ്റ്റി ആൻഡ് ക്വാളിറ്റി സെന്റർ മുന്നറിയിപ്പ് നൽകി. ഭക്ഷ്യോൽപന്നങ്ങളുടെ പരസ്യങ്ങൾക്കോ പ്രൊമോഷനുകൾക്കോ ഉള്ള അനുമതിക്കായി അപേക്ഷിക്കാൻ Food.approval@mafwr.gov.om എന്ന ഇമെയിൽ വിലാസം വഴി സെന്ററുമായി ബന്ധപ്പെടാവുന്നതാണ്.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.