കുവൈത്ത്​ തെരഞ്ഞെടുപ്പ്​: അന്താരാഷ്​ട്ര നിരീക്ഷകരെത്തും

കുവൈത്ത്​ സിറ്റി: കുവൈത്ത്​ പാർലമെൻറ്​ തെരഞ്ഞെടുപ്പ്​ നിരീക്ഷണത്തിന്​ അന്താരാഷ്​ട്ര പ്രതിനിധികൾ എത്തും. തെരഞ്ഞെടുപ്പ്​ നടപടികൾ സുതാര്യവും സ്വതന്ത്രവുമാണെന്ന്​ അന്താരാഷ്​ട്ര സമൂഹത്തെ ബോധ്യപ്പെടുത്താനാണ്​ വിവിധ രാജ്യങ്ങളിൽനിന്നുള്ള പ്രതിനിധികളെ നിരീക്ഷണത്തിനായി ക്ഷണിക്കുന്നത്​. ഇത്തവണ കോവിഡ്​ പ്രതിസന്ധിയിൽ വിമാന സർവിസുകൾ താളംതെറ്റിയിരിക്കുകയാണെങ്കിലും വിവിധ അന്താരാഷ്​ട്ര സംഘടനകളുടെയും രാഷ്​ട്രങ്ങളുടെയും പ്രതിനിധികളെ നിരീക്ഷകരായി ക്ഷണിക്കാനാണ്​ തീരുമാനമെന്ന്​ സർക്കാർ വൃത്തങ്ങൾ പറഞ്ഞു. മുൻകാലങ്ങളിലും ഇങ്ങനെ ക്ഷണിക്കാറുണ്ട്​.

ഡിസംബർ അഞ്ചിനാണ്​ കുവൈത്ത്​ പാർലമെൻറിലേക്ക്​ തെരഞ്ഞെടുപ്പ്​ നടക്കുന്നത്​. നാമനിർദേശ പത്രിക സമർപ്പണം പൂർത്തിയായിട്ടുണ്ട്​. നിശ്ചിത സമയം പൂർത്തിയായപ്പോൾ 395 പേരാണ്​ മത്സര രംഗത്തുള്ളത്​. 396 പേർ പത്രിക നൽകിയിരുന്നെങ്കിലും ഒരാൾ പിൻവാങ്ങി. നവംബർ 28 വരെ പിൻവലിക്കാൻ അവസരമുണ്ട്​. കുവൈത്തിൽ പാർട്ടി സംവിധാനത്തില​ല്ല തെരഞ്ഞെടുപ്പ്​ എങ്കിലും സലഫി, ഇഖ്​വാനി പിന്തുണയുള്ള കക്ഷികൾ പരോക്ഷമായി ഒരു ബ്ലോക്കായി പ്രതിപക്ഷത്തുണ്ട്​.

അഞ്ച്​ പാർലമെൻറ്​ മണ്ഡലങ്ങളിൽ ഒാരോന്നിൽനിന്നും പത്തുപേരെയാണ്​ തിരഞ്ഞെടുക്കുക. 50 അംഗ പാർലമെൻറിൽ 20 സീറ്റുകളിൽ വിജയിക്കാൻ പ്രതിപക്ഷത്തിന്​ കഴിഞ്ഞു. കോവിഡ്​ പ്രതിസന്ധി മുന്നിലുള്ളതിനാൽ ആ​ഭ്യന്തര മന്ത്രാലയവും ആരോഗ്യ മന്ത്രാലയവും ചേർന്നാണ്​ തെരഞ്ഞെടുപ്പ്​ നടപടിക്രമങ്ങൾക്ക്​ നേതൃത്വം നൽകുക. 102 സ്​കൂളുകൾ വോ​​െട്ടടുപ്പ്​ കേന്ദ്രങ്ങളായി നിശ്ചയിച്ചിട്ടുണ്ട്​.