ഹമദ്​ ടൗണിലെ എണ്ണ പൈപ്പ്​ലൈനിലുണ്ടായ സ്​ഫോടനം ഭീകരാക്രമണം

മനാമ: വെള്ളിയാഴ്​ച അർധരാത്രിയോടടുത്ത്​ ഹമദ്​ ടൗൺ മേഖലയിൽ ഒായൽ പൈപ്പ്​ലൈനിലുണ്ടായ സ്​ഫോടനം ആസൂത്രിതമായ ഭീകരാക്രമണമാണെന്ന്​​ ആഭ്യന്തര മന്ത്രി ലഫ്​.ജനറൽ ശൈഖ്​ റാഷിദ്​ ബിൻ അബ്​ദുല്ല ആൽ ഖലീഫ ട്വിറ്ററിൽ പറഞ്ഞു. സംഭവത്തിനു പിന്നിൽ പ്രവർത്തിച്ചവരെ കണ്ടെത്തി നിയമത്തിനുമുന്നിൽ ഹാജരാക്കുമെന്ന്​ അദ്ദേഹം വ്യക്തമാക്കി. ഇൗയിടെ രാജ്യത്തുണ്ടായ ഭീകരാക്രമണങ്ങളെല്ലാം ഇറാനിൽ നിന്നുള്ള നിർദേശങ്ങൾ അനുസരിച്ചാണ്​ നടപ്പാക്കുന്നത്​. ജനങ്ങളുടെ സുരക്ഷയാണ്​ പരമ പ്രധാനം. അതിൽ യാതൊരു അനുരഞ്​ജനവും ഉണ്ടാകില്ല. ^അദ്ദേഹം പറഞ്ഞു. 
   ബൂരി അൽ അമൽ ഹോസ്​പിറ്റലിൽ നിന്ന്​ ഏതാണ്ട്​ 100 മീറ്റർ മാറിയുള്ള ബസ്​ സ്​റ്റേഷനടുത്താണ്​ സ്​ഫോടനമുണ്ടായതെന്ന്​ പ്രാദേശിക പത്രം ദൃക്​സാക്ഷിയെ ഉദ്ധരിച്ച്​ റിപ്പോർട്ട്​ ചെയ്​തു. തുടർന്ന്​ ആശുപത്രിയിൽ നിന്നും സമീപത്തെവീടുകളിൽ നിന്നും നൂറുകണക്കിനാളുകളെ ഒഴിപ്പിച്ചു. അഗ്​നിശമന സേനാംഗങ്ങളും പൊലീസും മണിക്കൂറുകൾ യജ്​ഞിച്ചാണ്​ തീയണച്ചത്​. പൊ ലീസ്​ പ്രദേശം വളഞ്ഞതിനാൽ പല ഹൈവേകളിലും ഗതാഗത കുരുക്കും അനുഭവപ്പെട്ടു. 
     സ​്​ഫോടനം നടന്ന സ്​ഥലം ആഭ്യന്തര മന്ത്രി സന്ദർശിച്ചു. രാജ്യത്തി​​െൻറ സുരക്ഷ തകർക്കാനായി ബോധപൂർവം നടത്തിയ ആക്രമണമാണിതെന്ന്​ ആഭ്യന്തര മന്ത്രാലയം പ്രസ്​താവനയിൽ പറഞ്ഞു. സിവിൽ ഡിഫൻസ്​ ടീമിനൊപ്പം ബഹ്​റൈൻ പെട്രോളിയം കമ്പനി (ബാപ്​കോ)യുടെ സുരക്ഷ സംഘവും തീ നിയന്ത്രണ വിധേയമാക്കാൻ പരിശ്രമിച്ചു. ശനിയാഴ്​ച പുലർച്ചെയോടെയാണ്​ അഗ്​നിശമന ജോലികൾ പൂർത്തിയായത്​.