മനാമ: ലോക രക്തദാനദിനത്തിൽ ബഹ്റൈൻ പ്രതിഭ നടത്തിയ രക്തദാന ക്യാമ്പുകൾക്കുള്ള ആദരവ് പ്രതിഭ ഹെൽപ് ലൈൻ കൺവീനർ നൗഷാദ് പൂനൂർ ബഹ്റൈൻ ഡിഫൻസ് ഫോഴ്സും കിങ് ഹമദ് യൂനിവേഴ്സിറ്റിയും അവാലി കാർഡിയാക് ഹോസ്പിറ്റലും ചേർന്ന് സംയുക്തമായി സംഘടിപ്പിച്ച പരിപാടിയിൽ ഏറ്റുവാങ്ങി.
പ്രതിഭ ഹെൽപ് ലൈൻ നേതൃത്വത്തിൽ നാലു മേഖലകൾക്കു കീഴിലെ 27 യൂനിറ്റുകളിൽനിന്നുള്ള പ്രവർത്തകരും അനുഭാവികളുമാണ് കിങ് ഹമദ് യൂനിവേഴ്സിറ്റി ഹോസ്പിറ്റൽ, സൽമാനിയ മെഡിക്കൽ കോളജ്, ബി.ഡി.എഫ് ഹോസ്പിറ്റൽ റിഫ, അവാലി ഹോസ്പിറ്റൽ എന്നിവിടങ്ങളിൽ പലപ്പോഴായി സംഘടിപ്പിച്ച രക്തദാന ക്യാമ്പുകളുടെ ഭാഗമായത്. വിശുദ്ധ റമദാൻ മാസത്തിൽ മാരത്തൺ രക്തദാനം സംഘടിപ്പിച്ചും പ്രതിഭ പ്രവർത്തകർ മാതൃകയായിരുന്നു. കോവിഡ് കാലത്തു നടത്തിയ രക്തദാന ക്യാമ്പുകളുടെ ഭാഗമായി കഴിഞ്ഞ വർഷവും പ്രതിഭ ആദരവ് ഏറ്റു വാങ്ങിയിരുന്നു. ആയിരത്തിലധികം പ്രതിഭ പ്രവർത്തകരാണ് കോവിഡ് കാലത്തു മാത്രം രക്തദാനം നടത്തിയത്.
ബഹ്റൈൻ ആതുരസേവനരംഗം നൽകുന്ന ഈ അംഗീകാരം പ്രതിഭ പ്രവർത്തകർക്ക് കൂടുതൽ സാമൂഹിക-ജീവകാരുണ്യ പ്രവർത്തനങ്ങൾ ഏറ്റെടുത്തു നടത്താനുള്ള ഊർജമാകുമെന്നും ഈ പ്രവർത്തനങ്ങളിൽ പങ്കാളികളായ മുഴുവൻ പ്രവർത്തകരെയും അഭിവാദ്യംചെയ്യുന്നതായും പ്രതിഭ ജനറൽ സെക്രട്ടറി പ്രദീപ് പതേരിയും പ്രസിഡന്റ് അഡ്വ. ജോയ് വെട്ടിയാടനും അറിയിച്ചു.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.