ബഹ്റൈൻ പ്രതിനിധി സംഘം ലഫ്. ജനറൽ മുഹമ്മദ് അഹ്മദ് അൽ മർറിയുമായി ചർച്ച നടത്തുന്നു
മനാമ: യാത്രാരേഖാ മാനേജ്മെന്റിൽ ദുബൈയുടെ ആധുനിക രീതികൾ മനസ്സിലാക്കാൻ ബഹ്റൈൻ നാഷനാലിറ്റി, പാസ്പോർട്ട്, റെസിഡൻസ് അഫയേഴ്സ് വിഭാഗത്തിൽനിന്നുള്ള ഉന്നതതല സംഘം ദുബൈ ജനറൽ ഡയറക്ടറേറ്റ് ഓഫ് ഐഡന്റിറ്റി ആൻഡ് ഫോറിനേഴ്സ് അഫയേഴ്സ് (ജി.ഡി.ആർ.എഫ്.എ) സന്ദർശിച്ചു. യാത്രാരേഖകൾ, പാസ്പോർട്ട് വിതരണം, പുതുക്കൽ, പ്രിന്റിങ് എന്നിവയിലെ ദുബൈയുടെ ഡിജിറ്റൽ പരിവർത്തന മാതൃക പഠിക്കുക എന്ന ലക്ഷ്യത്തിന്റെ ഭാഗമായിരുന്നു സന്ദർശനം.
ജി.ഡി.ആർ.എഫ്.എ ദുബൈ ഡയറക്ടർ ജനറൽ ലഫ്. ജനറൽ മുഹമ്മദ് അഹ്മദ് അൽ മർറി, അസി. ഡയറക്ടർ ജനറൽ മേജർ ജനറൽ ഉബൈദ് മുഹൈർ ബിൻ സുറൂർ തുടങ്ങിയ ഉന്നത ഉദ്യോഗസ്ഥർ ബഹ്റൈൻ സംഘത്തെ സ്വാഗതം ചെയ്തു. ബഹ്റൈൻ പാസ്പോർട്ട് ഡയറക്ടറേറ്റ് ഡയറക്ടർ മേജർ ശൈഖ് സൽമാൻ ബിൻ അഹമ്മദ് ആൽ ഖലീഫയുടെ നേതൃത്വത്തിലുള്ള സംഘമാണ് ദുബൈയിൽ എത്തിയത്.
പ്രതിനിധി സംഘം നാഷനാലിറ്റി സെക്ടർ, യാത്രാരേഖകൾ അച്ചടിക്കുന്ന ഓഫിസ്, ദുബൈ അന്താരാഷ്ട്ര വിമാനത്താവളത്തിലെ ടെർമിനൽ 3-ലെ എയർപോർട്ട് സർവിസ് ഓഫിസ് എന്നിവിടങ്ങളിൽ സന്ദർശിച്ചു.ഗൾഫ് മേഖലയിലുടനീളമുള്ള സർക്കാർ സ്ഥാപനങ്ങളുടെ ബന്ധം ശക്തിപ്പെടുത്തുന്നതിനും മികച്ച പ്രവർത്തനരീതികൾ പങ്കുവെക്കുന്നതിനുമുള്ള ശ്രമങ്ങളുടെ ഭാഗമായാണ് പര്യടനമെന്ന് ലഫ്. ജനറൽ മുഹമ്മദ് അഹ്മദ് അൽ മർറി അഭിപ്രായപ്പെട്ടു.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.