മൂന്ന് ചിത്രക്കുറിപ്പുകൾ

മരം ചോദിക്കുന്നു;

നിനക്കെത്രകാലം

ഇവിടെ, ഈ മഴയത്ത്

കുട ചൂടാതെ നിൽക്കാനാവും?

കടൽ ചോദിക്കുന്നു;

ഒരു തോണിയോ, തുഴയോ

അല്ലെങ്കിൽ

കൈകാലിട്ടടിച്ച്

നന്നായൊന്നു നീന്താനറിയാതെ

നിനക്കെന്നെ പ്രാപിക്കാനാവുമോ?

വൃദ്ധ നായ പറയുന്നു;

അവർ എന്നെ

തെരുവിൽ തള്ളുന്നതുവരെ

ഞാൻ എത്ര പ്രതാപത്തോടെ

ജീവിച്ചിരുന്നവനായിരുന്നു

എന്ന കാര്യം നിനക്കറിയുമോ?