സഫാരി ഷോപ് ആൻഡ് ഷൈൻ: നാലാമത്തെ നറുക്കെടുപ്പ് വിജയികളെ പ്രഖ്യാപിച്ചു

ദോഹ: പ്രമുഖ ഹൈപ്പർമാർക്കറ്റ് ശൃംഖലയായ സഫാരി ഹൈപ്പർമാർക്കറ്റിന്റെ മെഗാ പ്രമോഷൻ ‘വിൻ സിക്സ് കിലോഗ്രാം’ ഗോൾഡ് പ്രമോഷന്റെ നാലാമത്തെ നറുക്കെടുപ്പ് ബർവ വില്ലേജിലെ സഫാരി ഹൈപ്പർമാർക്കറ്റിൽ നടന്നു. ഖത്തർ വാണിജ്യ മന്ത്രാലയം ഉദ്യോഗസ്ഥനും സഫാരി മാനേജ്മെന്റ് പ്രതിനിധികളും പ​ങ്കെടുത്തു.

ഒന്നാം സമ്മാനത്തിന് അർഹയായ എം.എ. ആൻ മാർഗരീറ്റ സൊർണോസക്ക് 250 ഗ്രാം സ്വർണവും രണ്ടാം സമ്മാനത്തിന് അർഹരായ ബി.കെ. മനോജ്, രാജേഷ് കുമാർ രാധാകൃഷ്ണൻ, മുഹമ്മദ് സക്കരിയ എന്നിവർക്ക് യഥാക്രമം 150 ഗ്രാം സ്വർണം വീതവും മൂന്നാംസമ്മാന വിജയികളായ ബിലാൽ ആലിക്കൽ, മുഹമ്മദ് കുഞ്ഞി, ജാബിർ മീത്താൽ ജാബിർ എന്നിവർക്ക് യഥാക്രമം 100 ഗ്രാം സ്വർണം വീതവും സമ്മാനമായി ലഭിക്കും.

ഏപ്രിൽ 20ന് അവസാനിക്കുന്ന ഷോപ് ആൻഡ് ഷൈൻ മെഗാ പ്രമോഷനിൽ സഫാരിയുടെ ഏത് ഔട്ട്ലറ്റിൽനിന്നും 50 റിയാലിന് പർച്ചേഴ്സ്​ ചെയ്യുമ്പോൾ ലഭിക്കുന്ന ഇ-റാഫിൾ കൂപ്പൺ നറുക്കെടുപ്പിലൂടെയാണ് വിജയികളെ കണ്ടെത്തുന്നത്. ഓരോ നറുക്കെടുപ്പിലും ഒരു കിലോ സ്വർണം ഏഴ് വിജയികൾക്കാണ് നൽകുന്നത്. പ്രമോഷന്റെ അഞ്ചാമത്തെ നറുക്കെടുപ്പ് മാർച്ച് മൂന്നിന് ഇൻഡസ്​ട്രിയൽ ഏരിയ, സ്​ട്രീറ്റ് 16ലെ സഫാരി ഹൈപ്പർമാർക്കറ്റിൽ നടക്കും.