ബൈഡ​െൻറ വിളിക്ക്​ പാതി ചെവികൊടുത്ത്​ നെതന്യാഹു; എന്നിട്ടും മരണമുനമ്പായി ഗസ്സ,

ജറൂസലം: ഗസ്സയിൽ ആക്രമണമവസാനിപ്പിക്കാൻ ഇസ്രായേൽ പ്രധാനമന്ത്രി ബിൻയമിൻ നെതന്യാഹുവിനെ വിളിച്ച്​ യു.എസ്​ പ്രസിഡൻറ്​ ജോ ബൈഡൻ ആവശ്യപ്പെട്ടതിന്​ പിറ്റേന്നും മരണവും മഹാനാശവും വിതച്ച്​ ബോംബറുകൾ. ആക്രമണത്തിന്​ തീവ്രത കുറഞ്ഞെന്ന്​ റിപ്പോർട്ടുകൾ സൂചിപ്പിക്കുന്ന ദിനത്തിൽ ഗസ്സയിലെ കെട്ടിടങ്ങൾക്കുമേൽ നടന്ന ആക്രമണങ്ങളിൽ ഒരാൾ മരിച്ചു. നിരവധി പേർക്ക്​ പരിക്കേറ്റു. ഇതോടെ, 11 ദിവസത്തിനിടെ ഗസ്സയിൽ മരണസംഖ്യ 65 കുട്ടികളുൾപെടെ230 ആയി. ഇസ്രായേലിൽ 12 ആണ്​ മരണം.

ബുധനാഴ്​ചയാണ്​ ബൈഡൻ നെതന്യാഹുവിനെ വീണ്ടും വിളിച്ച്​ വെടിനിർത്തൽ ആവശ്യപ്പെട്ടത്​. എന്നാൽ, കൂടുതൽ കരുത്തോടെ തുടരുമെന്നായിരുന്നു നെതന്യാഹുവി​െൻറ പ്രതികരണം. ആക്രമണം അവസാനിപ്പിക്കുമെന്ന്​ റിപ്പോർട്ടുകളു​ണ്ടായിരുന്നുവെങ്കിലും വ്യാഴാഴ്​ച വീണ്ടും ഇസ്രായേൽ ബോംബറുകൾ തീ വർഷിച്ചു. തകർന്ന കെട്ടിടങ്ങൾക്കടിയിൽ പെട്ടാണ്​ ഒരാൾ മരിച്ചത്​.

ഇസ്രായേൽ ആക്രമണം അവസാനിപ്പിക്കാൻ യു.എൻ രക്ഷാസമിതി നീക്കങ്ങളും ഇതുവരെ വിജയം കണ്ടിട്ടില്ല.

ഇസ്രായേൽ ആക്രമണങ്ങളിൽ ഇതുവരെ 32.2 കോടി ഡോളറി​െൻറ (2354 കോടി രൂപ) നാശനഷ്​ടമുണ്ടായതായി ഗസ്സ ഭരണകൂടം അറിയിച്ചു. 184 കെട്ടിടങ്ങൾ തകർത്തതിനു പുറമെ 33 മാധ്യമ കേന്ദ്രങ്ങളും ബോംബിങ്ങിൽ നാമാവശേഷമായി. 1,335 വീടുകൾ തകർക്കപ്പെട്ടു. 13,000 എണ്ണത്തിന്​ കേടുപാടുകൾ പറ്റി.

അതിനിടെ, വെസ്​റ്റ്​ബാങ്കിൽ ജൂത കുടിയേറ്റ സമുച്ചയങ്ങൾ നിർമാണത്തിൽ പങ്കുണ്ടെന്ന്​ സംശയിക്കുന്ന രണ്ടു കമ്പനികൾക്ക്​ നോർവേ ഫണ്ടിങ്​ നിർത്തി.