യു.എന്നി​െൻറത്​ യുദ്ധം ക്ഷണിച്ചുവരുത്തുന്ന നടപടി -ഉത്തരകൊറിയ

പ്യോങ്​യാങ്​: യു.എൻ രക്ഷാസമിതിയ പ്രഖ്യാപിച്ച പുതിയ ഉപരോധം യുദ്ധം ക്ഷണിച്ചു വരുത്തുന്നതിന്​ തുല്യമെന്ന്​ ഉത്തര കൊറിയ. ഭൂഖണ്ഡാന്തര ബാലിസ്​റ്റിക്​ മിസൈൽ പരീക്ഷണത്തെത്തുടർന്ന്​ ഉത്തര കൊറിയയെ ഒറ്റപ്പെടുത്തുന്നതിനാണ്​ യു.എൻ നടപടി. പുതിയ ഉപരോധം പൂർണമായും തള്ളിക്കളയുന്നു. യു.എൻ നടപടി തങ്ങളുടെ പരമാധികാരം ലംഘിക്കുന്നതാണ്​. കൊറിയൻ ഉപദ്വീപിലെ സ്​ഥിരതയും സമാധാനവും തകർക്കാൻ ലക്ഷ്യമിട്ടുള്ളതുമാണെന്ന്​ ഉത്തര കൊറിയൻ വിദേശകാര്യ മന്ത്രാലയം ആരോപിച്ചു. ആണവരാഷ്​ട്രമെന്ന നിലയിലുള്ള തങ്ങളുടെ വളർച്ച കണ്ട് വിരണ്ട യു.എസ് മറ്റു രാജ്യങ്ങളെ  കൂട്ടുപിടിച്ച്​ കടുത്ത സാമ്പത്തിക ഉപരോധം ഏർപ്പെടുത്തി സമ്മർദത്തിലാക്കാൻ ശ്രമിക്കുകയാണെന്നും ഉത്തര കൊറിയ കുറ്റപ്പെടുത്തി.

ഉത്തര കൊറിയയുടെ  വിദേശകാര്യ മന്ത്രാലയത്തി​​െൻറ പ്രസ്താവന ഔദ്യോഗിക വാർത്ത ഏജൻസിയായ കെ.സി.എൻ.എയാണ് പുറത്തുവിട്ടത്. യു.എസി​​െൻറ ഭീഷണി നേരിടാൻ കൂടുതൽ ആണവ സാങ്കേതികവിദ്യ വികസിപ്പിക്കാനുള്ള ശ്രമങ്ങളുമായി മുന്നോട്ടുപോകുമെന്നും അവർ  വ്യക്തമാക്കി. ഉപരോധത്തിനെതിരെ ഉത്തര കൊറിയയുടെ ആദ്യ പ്രതികരണമാണിത്​.  പെട്രോളിയം, ഇലക്​ട്രോണിക്​സ്​ ഉൽപന്നങ്ങളുടെ കയറ്റുമതി 90 ശതമാനം വരെ വെട്ടിക്കുറച്ചുകൊണ്ടുള്ള ഉപരോധമാണ്​ ഉത്തര കൊറിയക്കെതിരെ യു.എൻ പ്രഖ്യാപിച്ചത്​. വിദേശരാജ്യങ്ങളിൽ ജോലിചെയ്യുന്ന  ഉത്തര കൊറിയൻ പൗരന്മാരെ രണ്ടുവർഷത്തിനകം തിരിച്ചയക്കുക, ആണവ പരീക്ഷണങ്ങളിൽ ഏർപ്പെട്ട വ്യക്​തി​കളെയും കമ്പനികളെയും കരിമ്പട്ടികയിൽ പെടുത്തുക, എണ്ണ^കൽക്കരി തുടങ്ങിയ ഉൽപന്നങ്ങളുമായി ഉത്തര കൊറിയയിലേക്കും തിരിച്ചും പോകുന്ന കപ്പലുകൾക്ക്​ കർശന  നിയന്ത്രണം ഏർപ്പെടുത്തുക തുടങ്ങിയവയാണ്​ പ്രമേയത്തിലെ മറ്റു നിർദേശങ്ങൾ.