പരിശീലകൻ ജോർജ്​ സാംപോളി​യെ അർജൻറീന പുറത്താക്കി

ബ്വേനസ്​ ​എയ്​റിസ്​: ലോകകപ്പിലെ മോശം പ്രകടനത്തെത്തുടർന്ന് പരിശീലകൻ ജോർജ്​ സാംപോളി​യെ അർജൻറീന പുറത്താക്കി. ഒാരോ സമനിലയും ജയവും തോൽവിയുമായി തപ്പിത്തടഞ്ഞ്​ നോക്കൗട്ടിലെത്തിയ മുൻ ചാമ്പ്യന്മാർ ഫ്രാൻസിനോട്​ 4-3ന്​ തോറ്റ്​ പുറത്താകുകയായിരുന്നു. ഗ്രൂപ്​ ഘട്ടത്തിൽ ക്രൊയേഷ്യയോട് ഞെട്ടിക്കുന്ന തോൽവി വഴങ്ങിയതിന്​ പിന്നാലെ സാംപോളിയുടെ തൊപ്പി തെറിച്ചേക്കുമെന്ന്​ സൂചനയുണ്ടായിരുന്നു. 

2022 വരെ കരാറുള്ള സാംപോളിക്ക്​ പരിശീലകനെന്ന നിലയിൽ ഒരു വർഷം മാത്രമാണ് പൂർത്തിയാക്കാൻ ​ സാധിച്ചത്​. കരാർ പൂർത്തിയാകുന്നതിനുമുമ്പ്​ പുറത്താക്കിയതി​​െൻറ നഷ്​ടപരിഹാരമായി 20 ലക്ഷം ഡോളർ (ഏകദേ​ശം 13.72 കോടി രൂപ)  സാംപോളിക്ക്​ ലഭിച്ചേക്കുമെന്നാണ്​ സൂചന. സാംപോളി​ക്കു​ കീഴിൽ 15 മത്സരങ്ങൾ കളിച്ച അർജൻറീന ഏഴെണ്ണം ജയിച്ചപ്പോൾ നാലു വീതം മത്സരങ്ങളിൽ സമനിലയും തോൽവിയും ഏറ്റുവാങ്ങി.

2015ൽ അർജൻറീനയെ തോൽപിച്ച്​ കോപ അമേരിക്ക ചാമ്പ്യന്മാരായ ചിലിയെ പരിശീലിപ്പിച്ചിരുന്ന സാംപോളി  2017ൽ ലോകകപ്പ് യോഗ്യത നേടാൻ അർജൻറീന പാടുപെടുന്ന സമയത്താണ്​ ടീമി​​െൻറ പരിശീലകസ്ഥാനമേറ്റെടുത്തത്​. ആദ്യ മൂന്ന്​ യോഗ്യതാ മത്സരങ്ങൾ സമനിലയിൽ കലാശിച്ചെങ്കിലും അവസാന കളിയിൽ  എക്വഡോറിനെ 3-1ന്​ തകർത്താണ്​ അർജൻറീന റഷ്യയിലേക്ക്​ ടിക്കറ്റെടുത്തത്​​.