ഈസ്റ്റ് ബംഗാൾ താരങ്ങളെ വെട്ടിച്ച് മുന്നേറുന്ന എ.ടി.കെ മോഹൻബഗാന്റെ ആഷിഖ് കുരുണിയൻ
കൊൽക്കത്ത: സാൾട്ട് ലേക്കിലെ നിറഞ്ഞ ഗാലറിയെ സാക്ഷിയാക്കി ഡ്യൂറൻഡ് കപ്പ് കൊൽക്കത്ത ഡെർബിയിൽ എ.ടി.കെ മോഹൻ ബഗാന്റെ വിജയാരവം. ഈസ്റ്റ് ബംഗാളിനെ ഏക ഗോളിനാണ് തോൽപിച്ചത്. കൊണ്ടുംകൊടുത്തും മുന്നേറിയ ഇരുടീമിനും പക്ഷേ ആദ്യ 45 മിനിറ്റിൽ ഗോളൊന്നും നേടാനായില്ല. ഒന്നാം പകുതിയുടെ ഇഞ്ചുറി ടൈം രണ്ടാം മിനിറ്റിൽ ഈസ്റ്റ് ബംഗാൾ മുന്നേറ്റ നിരക്കാരൻ സുമീത് പാസിയുടെ സെൽഫ് ഗോളാണ് എ.ടി.കെ ബഗാന് തുണയായത്.
ലിസ്റ്റൻ കൊളാസോയുടെ കോർണർ കിക്ക് തടയുന്നതിൽ സംഭവിച്ച പിഴവ് ഗോളിന് കാരണമാവുകയായിരുന്നു. പാസിയുടെ ശരീരത്തിൽതട്ടി പന്ത് നേരെ വലയിലേക്ക്. മലയാളി താരം ആഷിഖ് കുരുണിയൻ എ.ടി.കെ ബഗാന് വേണ്ടി കളം നിറഞ്ഞു കളിച്ചു. ഈസ്റ്റ് ബംഗാൾ പ്രതിരോധത്തിലൂന്നി.
മൂന്നിൽ ഓരോ ജയവും സമനിലയും തോൽവിയുമായി ഗ്രൂപ് ബിയിൽ നാല് പോയന്റോടെ മൂന്നാമതാണ് എ.ടി.കെ ബഗാൻ. ഇത്രയും മത്സരങ്ങളിൽ രണ്ട് സമനിലയും ഒരു തോൽവിയുമുള്ള ഈസ്റ്റ് ബംഗാൾ രണ്ട് പോയന്റോടെ നാലാമതും. ഇരു ടീമിനും ഓരോ കളി ബാക്കിയിരിക്കെ ഈസ്റ്റ് ബംഗാൾ പുറത്തേക്കുള്ള വഴിയിലാണ്. അതേസമയം, ഗ്രൂപ് സി മത്സരത്തിൽ ആർമി റെഡിനെ ഒന്നിനെതിരെ രണ്ട് ഗോളിന് ട്രാവ് എഫ്.സി പരാജയപ്പെടുത്തി.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.