ചന്ദ്രനു പിന്നിൽ ശുക്രൻ മറഞ്ഞു; ആകാശത്ത് അപൂർവ വിസ്മയം

കോഴിക്കോട്: മാനത്ത് വിസ്മയം തീർത്ത് ചന്ദ്രന്റെ പിന്നിൽ ശുക്രൻ മറയുന്ന അപൂർവ പ്രതിഭാസമായ ‘ലൂണാർ ഒക്കൽറ്റേഷൻ’ (ഉപഗൂഹനം) ദക്ഷിണേന്ത്യയിൽ ഉടനീളം ദൃശ്യമായി. ആകാശം ഏറെക്കുറെ മേഘാവൃതമായിരുന്നുവെങ്കിലും കേരളത്തിലെ ആയിരക്കണക്കിന് വാനനിരീക്ഷകരും പൊതുജനങ്ങളും ഈ ആകാശക്കാഴ്ച കാണാൻ ആകാംക്ഷയോടെ കാത്തിരുന്നു.

തിങ്കളാഴ്ച വൈകീട്ട് 5.20ഓടെയാണ് ചന്ദ്രക്കലക്ക് പിന്നിലേക്ക് ശുക്രൻ മറഞ്ഞുതുടങ്ങിയത്. എന്നാൽ, പകൽവെളിച്ചം പൂർണമായി മാറാത്തതിനാൽ ഈ ഘട്ടം വെറും കണ്ണുകൊണ്ട് വ്യക്തമായി കാണാൻ പലർക്കും സാധിച്ചില്ല. എന്നാൽ, 6.45 ഓടെ ചന്ദ്രന്റെ പിന്നിൽനിന്ന് ശുക്രൻ തിരികെ പുറത്തുവന്ന നിമിഷം നവ്യമായൊരു ദൃശ്യവിരുന്നായി മാറി.

മേഘം മൂടിയ അന്തരീക്ഷമായിരുന്നെങ്കിലും സന്ധ്യ മയങ്ങിയതോടെ ആകാശം തെളിയുകയും ചന്ദ്രനും ശുക്രനും തൊട്ടടുത്തായി കൂടുതൽ തിളക്കത്തോടെ പ്രകടമാവുകയും ചെയ്തു.