നടുവൊടിക്കും നാട്ടുവഴികൾ

കല്ലമ്പലം: നാവായിക്കുളം പഞ്ചായത്തിലെ പ്രധാന ഗ്രാമീണ റോഡുകൾ തകർന്ന് യാത്ര ദുഷ്കരമായി. പല റോഡുകളും വർഷങ്ങളായി അറ്റകുറ്റപ്പണി ചെയ്യാതെ കുണ്ടും കുഴിയുമാണ്. പ്രധാനമന്ത്രി ഗ്രാമസഡക് യോജന പദ്ധതി പ്രകാരം 2008ൽ നിർമാണം പൂർത്തിയായ ഇടവൂർകോണം-കോട്ടറക്കോണം റോഡ് നിർമാണത്തിനു ശേഷം കാലമിത്രയായിട്ടും അറ്റകുറ്റപ്പണി നടന്നിട്ടില്ല. സ്വാമിയാർകുന്ന്, കരവായിക്കോണം, കോട്ടറക്കോണം മേഖലയിലുള്ളവർക്ക് കല്ലമ്പലത്തെത്തുന്നതിനുള്ള ഏക മാർഗമാണ് ഈ പാത. പഞ്ചായത്തിലെതന്നെ ഇടവൂർ കോണം-മുട്ടിയറ റോഡ്, പുളിയറക്കോണം -പുതുശ്ശേരിമുക്ക് റോഡ്, കല്ലമ്പലം - കടവൂർച്ചിറ റോഡ്, തുടങ്ങിയ പഞ്ചായത്ത് റോഡുകളെല്ലാം തകർന്നു. റോഡുകളുടെ തകർച്ച ഉടൻ പരിഹരിച്ച് സഞ്ചാരയോഗ്യമാക്കണമെന്നാണ് നാട്ടുകാരുടെ ആവശ്യം. എന്നാൽ, ഇടവൂർകോണം-സ്വാമിയാർ കുന്ന്-മുട്ടിയറ റോഡിന് 50 ലക്ഷം രൂപ അനുവദിച്ചതായും കോട്ടറക്കോണം -ഡീെസൻറ്മുക്ക് റോഡിന് 15 ലക്ഷം അനുവദിച്ചതായും പുളിയറക്കോണം -കൈപ്പടക്കോണം-പുതുശ്ശേരിമുക്ക് റോഡിന് 30 ലക്ഷം രൂപ അനുവദിച്ചതായും വാർഡ് അംഗം അറിയിച്ചു.