കമ്പനി ഉടമയുടെ ആത്മഹത്യ; വ്യവസായവകുപ്പ്​ ഡയറക്​ടർ അന്വേഷണം തുടങ്ങി

തിരുവനന്തപുരം: ജില്ല വ്യവസായവകുപ്പി​െൻറ പീഡനങ്ങളിൽ മനംനൊന്ത് ആത്മഹത്യചെയ്ത വേളി ഇൻഡസ്ട്രിയൽ എസ്റ്റേറ്റിലെ മെറ്റാക്കെയർ അലുമിനിയം ഫാബ്രിക്കേഷൻ കമ്പനി ഉടമ സുരേഷി​െൻറ മരണം സംബന്ധിച്ച് വ്യവസായവകുപ്പ് ഡയറക്ടർ കെ. ബിജു അന്വേഷണം ആരംഭിച്ചു. വ്യവസായമന്ത്രി എ.സി. മൊയ്തീ​െൻറ നിർദേശത്തെതുടർന്നാണ് അന്വേഷണം. സുരേഷി​െൻറ മരണവുമായി ബന്ധപ്പെട്ട് ഉദ്യോഗതലത്തിൽ വീഴ്ചയുണ്ടോയെന്ന കാര്യമാണ് ഡയറക്ടർ അന്വേഷിക്കുക. മൂന്നുദിവസത്തിനുള്ളിൽ റിപ്പോർട്ട് നൽകും. വ്യാഴാഴ്ചയാണ് തൃശൂർ വടക്കാഞ്ചേരി മുണ്ടത്തിക്കോട് എടുപടിക്കൽ വീട്ടിൽ സുരേഷ് വേളിയിലെ ത​െൻറ ഓഫിസ് മുറിയിൽ തൂങ്ങി മരിച്ചത്. നിലവിലെ കമ്പനി മാറ്റി പുതിയത് തുടങ്ങാൻ ജില്ല വ്യവസായവകുപ്പിന് അപേക്ഷ നൽകി ഒന്നര വർഷത്തിലധികം കാത്തിരുന്നിട്ടും നടപടിയുണ്ടായില്ല. ഇതിന് പിന്നാലെ സുരേഷി​െൻറ ഉടമസ്ഥതയിലുള്ള സ്ഥലത്തിന് വില ഉയർന്നതിനാൽ ഒരു സ​െൻറിന് 6.5 ലക്ഷം രൂപ കണക്കാക്കി 10 സ​െൻറിന് 63 ലക്ഷം വ്യവസായവകുപ്പിന് അടക്കണമെന്നും ജില്ല വ്യവസായവകുപ്പിൽനിന്ന് അറിയിപ്പ് ലഭിച്ചിരുന്നു. പണമടക്കാൻ സാധിച്ചില്ലെങ്കിൽ സ്ഥലം തിരികെ നൽകാനും ജില്ല വ്യവസായവകുപ്പ് ആവശ്യപ്പെട്ടിരുന്നു. ഇതിനെതുടർന്നാണ് ജില്ല വ്യവസായവകുപ്പിനെതിരെ കത്തെഴുതി വെച്ച് സുരേഷ് ഓഫിസിനുള്ളിൽ തൂങ്ങിമരിച്ചത്. മരണത്തെതുടർന്ന് വെള്ളിയാഴ്ച സുരേഷി‍​െൻറ മൃതദേഹവുമായി വ്യവസായികൾ വെള്ളയമ്പലം വ്യവസായവകുപ്പ് ഓഫിസിലേക്ക് പ്രതിഷേധമാർച്ചും നടത്തിയിരുന്നു.