കാലാവസ്​ഥ ചതിച്ചു; മാമ്പൂ കൊഴിയുന്നു

കൊല്ലങ്കോട്: മാങ്കോ സിറ്റി എന്നറിയപ്പെടുന്ന മുതലമടയിൽ കാലാവസ്​ഥ വ്യതിയാനം മൂലം മാമ്പൂക്കൾ വ്യാപകമായി കൊഴിയുന്നു. തമിഴ്നാട്ടിൽ വീശിയ ചുഴലിക്കാറ്റും തുടർന്നുണ്ടായ മഞ്ഞുവീഴ്ചയും മൂലം മുതലമടയിൽ 600 ഏക്കർ മാവിൻതോട്ടങ്ങളിലെ മാമ്പൂക്കൾ പൂർണമായും കരിഞ്ഞുണങ്ങി. മൂടികെട്ടിയ കാലാവസ്​ഥയും മഞ്ഞുവീഴ്ചയും മാവിെൻറ പൂക്കളുടെ വളർച്ചയെ പ്രതികൂലമായി ബാധിച്ചതാണ് കൊഴിയാൻ കാരണമായത്. ചപ്പക്കാട്, വെള്ളാരൻകടവ്, നരിപ്പാറചള്ള എന്നിവിടങ്ങളിലാണ് മാമ്പൂക്കൾ കൂടുതലായി കൊഴിയുന്നത്. ഇതിനെതിരെ കീടനാശിനി ഉപയോഗവും വളപ്രയോഗവും ഗുണംചെയ്യാത്തതിനാൽ കാലാവസ്​ഥ മാറ്റത്തിനായി കാത്തിരിക്കുകയാണ് കർഷകർ. നവംബർ ആദ്യവാരത്തിൽ പൂക്കളുണ്ടായ തോട്ടങ്ങളിലാണ് കൊഴിച്ചിൽ വ്യാപകമായത്. ജനുവരി പകുതിയോടെ വിളവെടുപ്പ് ആരംഭിക്കാമെന്ന് കാത്തിരുന്ന കർഷകർക്ക് നിലവിലെ കാലാവസ്​ഥ കനത്തപ്രഹരമാണേൽപിക്കുന്നത്. ഏക്കറിന് 70,000 മുതൽ ലക്ഷം രൂപ വരെ പാട്ടതുക നൽകി മാവിൻ തോട്ടങ്ങൾ പാട്ടത്തിനെടുത്ത കർഷകർക്കും നിലവിലെ കാലാവസ്​ഥ തിരിച്ചടിയാണ്. കൊഴിഞ്ഞതും ഉണങ്ങിയതുമായ പൂക്കൾക്കുപകരം വീണ്ടും പൂക്കുന്ന മാവുകൾ ഉണ്ടെങ്കിലും ഇത് ആദ്യത്തേതിൽനിന്ന് പകുതിയോളം കുറയും. മാത്രമല്ല വിളവെടുപ്പും വൈകും. ഇത് കച്ചവടത്തെ ബാധിക്കുമെന്ന് ചപ്പക്കാട്ടിലെ മാങ്ങകർഷകനായ ഷൈക്ക് മുസ്​തഫ പറയുന്നു. എല്ലാ മാവു കർഷകരെയും ഉൾപ്പെടുത്തി വിള ഇൻഷുറൻസ്​ പദ്ധതി നടപ്പാക്കണമെന്ന മാങ്ങകർഷകരുടെ ആവശ്യം നടപ്പാകാത്തതിലും വലിയ പ്രതിഷേധം നിലനിൽക്കുന്നുണ്ട്.