നൈജീരിയയുടെ അഹ്മദ് മൂസ കൊളത്തൂരിൽ കളിച്ചെന്ന വ്യാജ പോസ്റ്റ് സമൂഹമാധ്യമങ്ങളിൽ പ്രചരിച്ചിരുന്നു കൊളത്തൂർ: നൈജീരിയയുടെ മിന്നും താരം അഹ്മദ് മൂസ കഴിഞ്ഞ വർഷങ്ങളിൽ മലപ്പുറത്ത് സെവൻസ് ഫുട്ബാൾ കളിച്ചിട്ടുണ്ടെന്ന വ്യാജ പോസ്റ്റ് സമൂഹമാധ്യമങ്ങളിൽ വൻ പ്രചാരം നേടി. സംഭവം വിവാദമായതോടെ പോസ്റ്റിട്ട പുലാമന്തോൾ വളപുരം സ്വദേശിയായ പ്രവാസി മാപ്പപേക്ഷയുമായി രംഗത്തെത്തി. ഐസ്ലൻഡിനെതിരെ കഴിഞ്ഞ ദിവസം രണ്ട് തകർപ്പൻ ഗോളുകൾ നേടിയ അഹ്മദ് മൂസ അഖിലേന്ത്യ സെവൻസിലെ കരുത്തരായ അൽ മദീന ചെർപ്പുളശ്ശേരിക്കു വേണ്ടി ബൂട്ടണിഞ്ഞെന്നായിരുന്നു ഫേസ്ബുക്ക് പോസ്റ്റ്. വ്യാജ വാർത്തക്ക് ബലം നൽകാനായി വിക്കിപീഡിയയിൽനിന്ന് കോപ്പി ചെയ്ത താരത്തിെൻറ പ്രൊഫൈൽ എഡിറ്റ് ചെയ്ത് ചെർപ്പുളശ്ശേരി ക്ലബിെൻറ പേരും ചേർത്തു. കുറഞ്ഞ സമയത്തിനുള്ളിൽ ഫേസ്ബുക്കിലും വാട്സ്ആപ്പിലും പോസ്റ്റ് പ്രചരിച്ചു. വാർത്തയുടെ നിജസ്ഥിതി അറിയാൻ നിരവധി ഫുട്ബാൾ പ്രേമികൾ അൽ മദീന ക്ലബ് അധികൃതരെ ബന്ധപ്പെട്ടതോടെ ക്ലബ് പോസ്റ്റിനെതിരെ രംഗത്തുവന്നു. വ്യാജവാർത്തക്കെതിരെ നിയമനടപടിക്കൊരുങ്ങുന്നതിനിടെയാണ് പോസ്റ്റിട്ട പുലാമന്തോൾ വളപുരം സ്വദേശി അൽ മദീന ക്ലബ് അധികൃതരോട് ഫേസ്ബുക്കിലൂടെ തന്നെ മാപ്പപേക്ഷിച്ചത്.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.