മുതിർന്ന പൗരന്മാരുടെ ക്ഷേമം മക്കൾക്കൊപ്പം സർക്കാരുകളുടെയും ബാധ്യത: വി.എസ്​

നെടുമങ്ങാട്​: മുതിർന്ന പൗരൻമാർ അവരുടെ യൗവനകാലവും കർമ്മകാണ്ഡവും നമ്മുടെ സാമൂഹ്യ ജീവിതം മെച്ചപ്പെടുത്താൻ ചെലവഴിച്ചതിനാൽ അവരെ സംരക്ഷിക്കുന്നതിനും സ്വച്ഛസുന്ദരമായ ജീവിതം ഉറപ്പാക്കുന്നതിനും മക്കൾക്കെന്ന പോലെ ബാധ്യത കേന്ദ്ര സംസ്​ഥാന സർക്കാരുകൾക്കുമുണ്ടെന്ന് ഭരണ പരിഷ്കാര കമ്മിഷൻ ചെയർമാൻ വി.എസ്​. അച്യുതാന്ദൻ. വയോജനങ്ങൾക്കായി പനവൂർ ഗ്രാമപഞ്ചായത്ത് നടപ്പിലാക്കുന്ന ഈ പദ്ധതി ഏറെ ശ്ലാഘനീയമാണെന്നും സംസ്​ഥാനത്തെ എല്ലാ ത്രിതല പഞ്ചായത്തുകളും ഇത്തരത്തിലുള്ള പദ്ധതികൾ ഏറ്റെടുത്തു നടത്തണമെന്നും അദ്ദേഹം പറഞ്ഞു. പനവൂർ ഗ്രാമപഞ്ചായത്തിന്‍റെ വയോസൗഹൃദ ഗ്രാമം പദ്ധതിയുടെ വയോജനസംഗമം പനവൂർ എച്ച് ഐ ഓഡിറ്റോറിയത്തിൽ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.