ക്വാറിയിലെ വെള്ളത്തിൽ വീണ് ചികിത്സയിലിരുന്ന കുട്ടികൾ മരിച്ചു
കോട്ടക്കൽ: ഉപയോഗശൂന്യമായ ക്വാറിയിലെ വെള്ളക്കെട്ടിൽ വീണ് ഗുരുതരാവസ്ഥയിൽ ചികിത്സയിലിരുന്ന കുട്ടികൾ മരിച്ചു . കേരള മുസ്ലിം ജമാഅത്ത് കോട്ടക്കൽ സോൺ പ്രസിഡൻറ് കുറ്റിപ്പുറം വടക്കേത്തല പുതിയ മാളിയേക്കൽ മുഹമ്മദ് ബാക്കിർ ശ ിഹാബ് തങ്ങളുടെ മകൻ സയ്യിദ് ത്വയ്യിബ് (10), പരപ്പനങ്ങാടി വലിയ സിയാറത്തിങ്ങൽ യൂസുഫ് കോയ തങ്ങളുടെ മകൻ സയ്യിദ് ഫജാസ് (എട്ട്) എന്നിവരാണ് മരിച്ചത്.
കോട്ടക്കൽ കുറ്റിപ്പുറം ആലിൻചുവട്ടിൽ ചൊവ്വാഴ്ച വൈകീട്ട് ആറോടെയായിരുന്നു സംഭവം. വിരുന്നിനെത്തിയ ഫജാസും ത്വയ്യിബും ഉൾപ്പെടെയുള്ള കുട്ടികൾ മണ്ണും മറ്റുമിട്ട് നികത്തിയ ക്വാറിയിലെ വെള്ളക്കെട്ടിൽ വീഴുകയായിരുന്നു. കൂടെയുണ്ടായിരുന്ന മറ്റൊരു കുട്ടി വിവരമറിയിച്ചതിനെ തുടർന്ന് നടത്തിയ തിരച്ചിലിൽ ഇരുവരെയും പുറത്തെടുത്ത് ആസ്റ്റർ മിംസ് ആശുപത്രിയിൽ എത്തിച്ചു. തീവ്രപരിചരണ വിഭാഗത്തിൽ ചികിത്സയിലായിരുന്നു. വ്യാഴാഴ്ച രാവിലെ ത്വയിബും ഉച്ചയോടെ ഫജാസും മരിച്ചു. കോട്ടക്കൽ പൊലീസ് നടപടികൾ സ്വീകരിച്ചു.
ത്വയ്യിബ് നായാടിപ്പാറ ഗവ. യു.പി സ്കൂൾ വിദ്യാർഥിയാണ്. മാതാവ്: ഷഹർബാൻ. സഹോദരങ്ങൾ: സയ്യിദ് മുഹമ്മദ് ഹാഷിർ, ആയിശത്തു സനിയ്യ ബീവി, ഫസീഹ ബീവി, സയ്യിദ് മുസമ്മിൽ.
ഫജാസ് പാലായി ഹിദായ രണ്ടാം ക്ലാസ് വിദ്യാർഥിയാണ്. മാതാവ്: മറിയം മുത്തു ബീവി. സഹോദരങ്ങൾ: സയ്യിദ് ഫായിസ്, സയ്യിദ് ഫർഹാൻ.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.