വൈത്തിരിക്കടുത്ത് തേയിലത്തോട്ടത്തിൽ കടുവകൾ; ഭീതിയിൽ ജനം

വൈത്തിരി: വൈത്തിരി തളിമല വേങ്ങക്കോട്ട എസ്റ്റേറ്റിന് സമീപം രണ്ടു കടുവകൾ ഇറങ്ങി. ഇന്ന് രാവിലെ എട്ടു മണിയോടടുത്താണ് എസ്റ്റേറ്റ് തൊഴിലാളി ചായത്തോട്ടത്തിലൂടെ രണ്ടു കടുവകൾ സഞ്ചരിക്കുന്നത് കണ്ടത്. എസ്റ്റേറ്റിനോട് ചേർന്നുള്ള വനത്തിൽ നിന്നാണ് ഇവ എത്തിയതെന്നാണ് വനം വകുപ്പുദ്യോഗസ്ഥർ വിലയിരുത്തുന്നത്.

വനം വകുപ്പ് മേപ്പാടി റേഞ്ച് ജീവനക്കാർ സ്ഥലത്തെത്തി നിരീക്ഷണം നടത്തി. കടുവകൾ കാടിനുള്ളിലേക്ക് തന്നെ കയറിപ്പോയിരിക്കാമെന്നും ഉദ്യോഗസ്ഥർ പറഞ്ഞു. കടുവകളിറങ്ങിയെന്ന വാർത്ത പരന്നതോടെ ജനങ്ങൾ ഭീതിയിലാണ്. നേരത്തെ കിലോമീറ്ററുകൾക്കപ്പുറം മേപ്പാടിയിൽ കടുവയെ കണ്ടിരുന്നു.