ഒാ​ഖി: കാണാതയവരെ കണ്ടെത്താൻ നടപടി സ്വീകരിക്കും -പ്രധാനമന്ത്രി 

തിരുവനന്തപുരം: ‘സർക്കാർ നിങ്ങൾക്കൊപ്പമുണ്ട്​. കാണാതായ മുഴുവൻ പേരെയും ക്രിസ്​മസിനു മുമ്പ്​ വീടുകളിൽ തിരികെയെത്തിക്കും’-ഒാഖി ചുഴലിക്കാറ്റ്​ ദുരന്തബാധിതരെ സമാശ്വസിപ്പിച്ചു കൊണ്ട്​ പ്രധാനമന്ത്രി നരേന്ദ്ര​ മോദി ഉറപ്പുനൽകി. ദുരിതബാധിതരിൽ നിന്ന്​ നേരിട്ട്​ പരാതി കേൾക്കാൻ പൂന്തുറയിലെത്തിയപ്പോഴാണ്​ മോദി ഇൗ ഉറപ്പ്​ നൽകിയത്​. 

‘ദുരന്തം ​സംഭവിച്ചയുടൻതന്നെ പ്രതിരോധമന്ത്രി നിർമല സീതാരാമനെ ഇ​വിടേക്കയച്ചു. ദുരിതാശ്വാസ പ്രവർത്തനം ഉൗർജിതമാക്കാൻ തീരദേശ-നാവിക സേനകൾക്ക്​ നിർദേശവും നൽകി. സർവവും നഷ്​ടപ്പെട്ടവ​​​െൻറ ദുഃഖം മനസ്സിലാക്കുന്നു. നിങ്ങളുടെ ദുഃഖത്തിൽ രാജ്യവും പങ്കുചേരുന്നു. ആഘോഷിക്കാനുള്ള സമയമല്ലിത്. കാണാതായവരെ തിരികെ കൊണ്ടുവരാൻ സർക്കാർ എന്തിനും തയാറാണ്​. കടലിൽ നടത്തുന്ന തിരച്ചിൽ തുടരും. ഇക്കാര്യത്തിൽ വിട്ടുവീഴ്​ചയൊന്നുമുണ്ടാകില്ല. ഓഖി ദുരിതബാധിതരോടൊപ്പം രാജ്യമുണ്ടെന്ന്​ ഉറപ്പുനൽകാനാണ് ഞാൻ ഇവിടെ എത്തിയത്​’- പ്രധാനമന്ത്രി കൂട്ടിച്ചേർത്തു. ചൊവ്വാഴ്​ച വൈകീട്ട്​ 4.50നാണ്​ പ്രധാനമന്ത്രി പൂന്തുറ സ​​െൻറ്​ തോമസ് ഒാഡിറ്റോറിയത്തിലെത്തിയത്​.  ദുരിതബാധിതർക്കിടയിലേക്കിറങ്ങി പരിഭവങ്ങൾ കേട്ടു. 

പൂന്തുറ, വിഴിഞ്ഞം, വലിയതുറ, പുതുക്കുറിച്ചി തുടങ്ങിയ പ്രദേശങ്ങളിലെ ദുരിതബാധിതരാണ്​ പ്രധാനമന്ത്രിക്ക്​ മുന്നിലെത്തിയത്​. വേദിയിൽനിന്ന്​ സദസ്സിലേക്ക്​ ഇറങ്ങിവന്ന്​ ഏതാനും പേരുടെ പരാതി കേട്ടു. ഗവർണർ പി. സദാശിവം, മുഖ്യമന്ത്രി പിണറായി വിജയൻ, കേന്ദ്ര സഹമന്ത്രിമാരായ പൊൻ രാധാകൃഷ്ണൻ, അൽഫോൺസ്​ കണ്ണന്താനം, സംസ്​ഥാന മന്ത്രിമാരായ ഇ. ചന്ദ്രശേഖരൻ, മേഴ്സിക്കുട്ടിയമ്മ, കടകംപള്ളി സുരേന്ദ്രൻ, എം.പിമാരായ സു​രേഷ്​ ഗോപി, റിച്ചാർഡ് ഹേ, എം.എൽ.എമാരായ ഒ. രാജഗോപാൽ, വി.എസ്​. ശിവകുമാർ, ജില്ല കലക്​ടർ കെ. വാസുകി തുടങ്ങിയവരും പ്രധാനമന്ത്രിക്കൊപ്പം ഉണ്ടായിരുന്നു. കന്യാകുമാരിയിൽ ചുഴലിക്കാറ്റ് ദുരിതബാധിതരെ കണ്ടശേഷമാണ്​ പ്രധാനമന്ത്രി പൂന്തുറയിലെത്തിയത്​.

അതേസമയം, ​പ്രധാനമന്ത്രി വേദി വിട്ടയുടൻ മത്സ്യത്തൊഴിലാളികൾ പ്രതിഷേധവുമായി രംഗത്തെത്തി. തങ്ങളുടെ പരാതികളും പരിദേവനങ്ങളുമായി മത്സ്യത്തൊഴിലാളികൾ മണിക്കൂറുകൾ കാത്തുനിൽക്കുകയായിരുന്നു. എന്നാൽ,  പ്രധാനമന്ത്രി തങ്ങളെ കേൾക്കാൻപോലും തയാറായില്ലെന്ന്​ പ്രതിഷേധക്കാർ ആരോപിച്ചു.