തിരുവനന്തപുരം: ലോക്സഭ തെരഞ്ഞെടുപ്പ് ഫലത്തിന് മണിക്കൂറുകൾ മാത്രം ശേഷിക്കെ ആകാംക്ഷയിലാണ് ജനം. ഇലക്ട്രോണിക്കലി ട്രാന്സ്മിറ്റഡ് പോസ്റ്റല് ബാലറ്റുകളും, പോസ്റ്റല് ബാലറ്റുകളും എണ്ണിത്തുടങ്ങുന്നതോടെയാണ് നാളെ രാവിലെ ഫലം വന്നുതുടങ്ങുക. റിട്ടേണിങ് ഓഫീസറുടെ മേശപ്പുറത്താകും ഇവ എണ്ണുക. അരമണിക്കൂറിനകം തന്നെ വോട്ടിങ് മെഷീനുകളിലെ വോട്ടുകളും എണ്ണിത്തുടങ്ങും.
രാവിലെ സ്ട്രോങ്ങ് റൂം റിട്ടേണിങ് ഓഫീസര്, അസിസ്റ്റന്റ് റിട്ടേണിങ് ഓഫീസര്, സ്ഥാനാര്ത്ഥികള് അല്ലെങ്കില് അവരുടെ തെരഞ്ഞെടുപ്പ് ഏജന്റുമാര്, തെരഞ്ഞെടുപ്പ് കമീഷന് നിരീക്ഷകര് എന്നിവരുടെ സാന്നിധ്യത്തിൽ തുറക്കും. ലോഗ് ബുക്കില് എന്ട്രി രേഖപ്പെടുത്തിയശേഷം വീഡിയോ റെക്കോഡ് ചെയ്താണ് മുറിയുടെ ലോക്ക് തുറക്കുക. തുടർന്ന് ഇലക്ട്രോണിക്കലി ട്രാന്സ്മിറ്റഡ് പോസ്റ്റല് ബാലറ്റുകളും, പോസ്റ്റല് ബാലറ്റുകളും റിട്ടേണിങ് ഓഫീസറുടെ മേശപ്പുറത്ത് എണ്ണും. അരമണിക്കൂറിനകം തന്നെ വോട്ടിങ് മെഷീനുകളിലെ വോട്ടുകളും എണ്ണിത്തുടങ്ങും.
വോട്ടിങ് യന്ത്രത്തിന്റെ കണ്ട്രോള് യൂനിറ്റാണ് വോട്ടെണ്ണലിന് ഉപയോഗിക്കുക. പോള് ചെയ്ത വോട്ടുകളുടെ എണ്ണം രേഖപ്പെടുത്തിയ ഫോം 17 സിയും അതത് കണ്ട്രോള് യൂനിറ്റുമാണ് വോട്ടെണ്ണല് മേശപ്പുറത്ത് വെക്കുക. കൗണ്ടിങ് ടേബിളില് കണ്ട്രോള് യൂനിറ്റ് എത്തിച്ച് കൗണ്ടിങ് ഏജന്റുമാരുടെ സാന്നിധ്യത്തില് കൗണ്ടിങ് സൂപ്പര്വൈസര് വോട്ടിങ് യന്ത്രം പരിശോധിച്ച് കേടുപാടുകള് ഒന്നും സംഭവിച്ചിട്ടില്ലെന്ന് ഉറപ്പാക്കിയ ശേഷം സീല്പൊട്ടിക്കും.
ഏജന്റുമാരുടെ നിരീക്ഷണത്തില് ഓരോ യന്ത്രത്തിലെയും റിസൾട്ട് ബട്ടണില് സൂപ്പര്വൈസര് വിരല് അമര്ത്തി ഓരോ സ്ഥാനാര്ഥിക്കും ലഭിച്ച വോട്ട് ഡിസ്പ്ലേ എജന്റുമാരെ കാണിച്ച ശേഷം രേഖപ്പെടുത്തും. ഓരോ റൗണ്ടിലും, എല്ലാ വോട്ടിങ് മെഷീനുകളും എണ്ണിത്തീര്ന്ന ശേഷം തെരഞ്ഞെടുപ്പ് കമീഷന്റെ നിരീക്ഷകന് അതില്നിന്നും ഏതെങ്കിലും രണ്ടു മെഷീന് എടുത്ത് അതിലെ കൗണ്ട് രേഖപ്പെടുത്തിയിരിക്കുന്നത് ശരിയാണെന്ന് ഉറപ്പു വരുത്തും. അത് കഴിഞ്ഞാല് ആ റൗണ്ടിന്റെ ടാബുലേഷന് നടത്തി ആ റൗണ്ടിന്റെ ഫലം റിട്ടേണിങ് ഓഫീസര് പ്രഖ്യാപിച്ച് രേഖപ്പെടുത്തും.
ഓരോ ഘട്ടം കഴിയുമ്പോഴും റിട്ടേണിങ് ഓഫീസര് എണ്ണിക്കഴിഞ്ഞ വോട്ടിങ് മെഷീനുകള് എടുത്തുമാറ്റി അടുത്ത ഘട്ടം തുടങ്ങാനുള്ള വോട്ടിങ് മെഷീനുകള് കൊണ്ടുവരാന് നിര്ദേശം നല്കും. എല്ലാ റൗണ്ടിലെയും വോട്ടിങ് മെഷീനുകളിലെ വോട്ടെണ്ണല് പൂര്ത്തിയാക്കിയ ശേഷം മാത്രമേ വിവിപാറ്റ് സ്ലിപ്പുകളുടെ വെരിഫിക്കേഷന് നടത്തൂ. ഒരു വിവിപാറ്റ് മെഷീനിലെ സ്ലിപ്പുകള് എണ്ണിത്തീരാന് ഒരു മണിക്കൂറെങ്കിലും എടുക്കും. ഇതിന് ശേഷം അന്തിമവിധി പ്രഖ്യാപന നടത്തും.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.