തിരുവനന്തപുരം: ആശുപത്രികളിലെത്താതെ രോഗികള്ക്ക് വീട്ടില് തന്നെ സൗജന്യമായി ഡയാലിസിസ് ചെയ്യാന് കഴിയുന്ന പെരിറ്റോണിയല് ഡയാലിസിസ് പദ്ധതി എല്ലാ ജില്ലകളിലും ആരംഭിച്ചതായി മന്ത്രി വീണാ ജോര്ജ്. രജിസ്റ്റര് ചെയ്ത രോഗികള്ക്ക് പെരിറ്റോണിയല് ഡയാലിസിസിന് ആവശ്യമായ ഡയാലിസിസ് ഫ്ലൂയിഡ്, കത്തീറ്റര്, അനുബന്ധ സാമഗ്രികള് എന്നിവ ആശുപത്രികളില്നിന്ന് സൗജന്യമായി ലഭ്യമാക്കുന്നു.
നിലവില് ആയിരത്തോളം രോഗികള്ക്കാണ് ഈ സേവനം നല്കി വരുന്നത്. വൃക്ക രോഗികളുടെ എണ്ണം ക്രമാതീതമായി വര്ധിച്ചതിനെ തുടര്ന്ന് ഡയാലിസിസ് പദ്ധതി സംസ്ഥാനത്തുടനീളം നടപ്പിലാക്കിയിട്ടുണ്ട്. ഇതുകൂടാതെയാണ് പെരിറ്റോണിയല് ഡയാലിസിസ് പദ്ധതി വ്യാപിപ്പിക്കുന്നതെന്നും മന്ത്രി വ്യക്തമാക്കി.
തിരുവനന്തപുരം ജനറല് ആശുപത്രി, കൊല്ലം ജില്ല ആശുപത്രി, പത്തനംതിട്ട ജനറല് ആശുപത്രി, ആലപ്പുഴ ജനറല് ആശുപത്രി, കോട്ടയം ജനറല് ആശുപത്രി, ഇടുക്കി തൊടുപുഴ ജില്ല ആശുപത്രി, എറണാകുളം ജനറല് ആശുപത്രി, തൃശൂര് ജനറല് ആശുപത്രി, പാലക്കാട് ജില്ല ആശുപത്രി, മലപ്പുറം തിരൂര് ജില്ല ആശുപത്രി, കോഴിക്കോട് ജനറല് ആശുപത്രി, വയനാട് മാനന്തവാടി ജില്ല ആശുപത്രി, കണ്ണൂര് ജില്ല ആശുപത്രി, കാസർകോട് ജനറല് ആശുപത്രി എന്നീ ആശുപത്രികള് മുഖേനയാണ് വീട്ടില് സൗജന്യമായി ഡയാലിസിസ് ചെയ്യാന് കഴിയുന്ന സേവനം ലഭ്യമാക്കുന്നത്.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.