വീടിനുള്ളിലേക്ക് ഓടിക്കയറിയ തെരുവുനായ് ബാലികയെ കടിച്ച് പരിക്കേൽപ്പിച്ചു

വടക്കാഞ്ചേരി: വീട്ടിലേക്ക് ഓടിക്കയറിയ തെരുവുനായ് ബാലികയെ കടിച്ച് പരിക്കേൽപ്പിച്ചു. നിരവധി വളർത്തുമൃഗങ്ങളെയും തെരുവ് നായ്ക്കളെയും ആക്രമിച്ചു. കുമ്പളങ്ങാട് കുറുമക്കാവ് ക്ഷേത്രത്തിന് സമീപത്തെ വീട്ടിലാണ് സംഭവം. പാണേങ്ങാടൻ സിജോയുടെ മകൾ സനമരിയയെയാണ് (9) ആക്രമിച്ചത്. കുമ്പളങ്ങാട് എൽ.പി സ്കൂളിലെ നാലാം ക്ലാസ് വിദ്യാർഥിയാണ്. ചൊവ്വാഴ്ച വൈകീട്ട് മൂന്നരയോടെയാണ് സംഭവം. വീടിനുള്ളിലിരിക്കുകയായിരുന്നു കുട്ടി. വീട്ടുകാർ ബഹളം വെച്ച് വടിയെടുത്ത് ഓടിച്ചുവിട്ടതിനെ തുടർന്ന് പുറത്തേക്കിറങ്ങിയോടിയ നായ് മേഖലയിലെ നിരവധി വളർത്ത് മൃഗങ്ങളെയും തെരുവ് നായ്ക്കളെയും ആക്രമിച്ചു. കുട്ടിയെ മുളങ്കുന്നത്തുകാവ് മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. നാട്ടുകാർ ചേർന്ന് പിടികൂടിയ നായെ പേവിഷ പരിശോധനക്ക് വിധേയമാക്കും.