മിൽമ പ്ലാൻറിലേക്ക്​ വെള്ളം നൽകുവാനുള്ള തീരുമാനം പിൻവലിക്കണം -കോൺഗ്രസ്​

പത്തനംതിട്ട: വള്ളിക്കോട് -കൊടുമൺ ശുദ്ധജലവിതരണ പദ്ധതിയിൽനിന്ന്​ തട്ട മാമ്മൂട്​ മിൽമ പ്ലാൻറിലേക്ക്​ വെള്ളം നൽകുവാനുള്ള പഞ്ചായത്ത്​ തീരുമാനം സർക്കാർ ഇടപെട്ട്​ നിർത്തിവെപ്പിക്കണമെന്ന്​​ വള്ളിക്കോട്​ മണ്ഡലം കോൺഗ്രസ്​ കമ്മിറ്റി ഭാരവാഹികൾ വാർത്തസ​മ്മേളനത്തിൽ ആവശ്യപ്പെട്ടു. നാട്ടുകാരുടെ കുടിവെള്ളം മുട്ടിക്കുന്ന വള്ളിക്കോട് പഞ്ചായത്ത് ഭരണസമിതിക്കെതിരെ ബുധനാഴ്ച രാവിലെ 10ന്​ പഞ്ചായത്ത് ഓഫിസിന്​ മുന്നിൽ ജനകീയ പ്രക്ഷോഭം ആരംഭിക്കുമെന്നും ഭാരവാഹികൾ പറഞ്ഞു. ഡി.സി.സി പ്രസിഡൻറ് സതീഷ് കൊച്ചുപറമ്പിൽ ഉദ്ഘാടനം ചെയ്യും. വള്ളിക്കോട് പഞ്ചായത്തിൽ പ്രവർത്തിക്കുന്ന ട്രീറ്റ്മൻെറ് പ്ലാൻറിൽനിന്നുമാണ് വള്ളിക്കോട്-കൊടുമൺ എന്നീ രണ്ട്​ പഞ്ചായത്തുകളിലേക്ക്​ കുടിവെള്ള വിതരണം നടത്തുന്നത്. പമ്പിങ്ങിന് ആവശ്യത്തിന്​ ​വെള്ളം ഇല്ലാത്തതുകാരണം ഇപ്പോൾ മൂന്നുദിവസത്തിൽ ഒരിക്കൽ മാത്രമാണ് ജല വിതരണം നടക്കുന്നത്. ഇത്തരമൊരു സാഹചര്യത്തിലാണ്​ മിൽമക്ക്​​ വെള്ളം നൽകാൻ ശ്രമിക്കുന്നത്. ​മുൻ യു.ഡി.എഫ്​ പഞ്ചായത്ത് ഭരണസമിതി ഏർപ്പെടുത്തിയ നിരോധനം നീക്കിയാണ് ഇപ്പോൾ രഹസ്യമായി മിൽമക്ക്​ വെള്ളമെടുക്കുന്നതിനുള്ള അനുമതി പഞ്ചായത്ത് നൽകിയത്. ഈ തീരുമാനം ജന​​ദ്രോഹമാണ്​. ഇപ്പോൾ നിത്യേന രണ്ടരലക്ഷം ലിറ്റർ വെള്ളം മിൽമക്ക്​ വേണ്ടിവരുന്നുണ്ട്. ഇതോടെ നാട്ടുകാർക്ക്​ ഒട്ടും വെള്ളം കിട്ടാതെ വരുമെന്നും നേതാക്കൾ പറഞ്ഞു. വാർത്തസമ്മേളനത്തിൽ ഡി.സി.സി ജനറൽ സെക്രട്ടറി സജി കൊട്ടക്കാട്, കോൺഗ്രസ് മണ്ഡലം പ്രസിഡൻറ്​ ​പ്രഫ. ജി. ജോൺ, മുൻ പഞ്ചായത്ത് പ്രസിഡന്‍റ്​ ലിസിമോൾ ജോസഫ്​, മുൻ ബ്ലോക്ക് പഞ്ചായത്ത് വൈസ് പ്രസിഡൻറ് റോസമ്മ ബാബുജി, പഞ്ചായത്ത് മെംബർ സുഭാഷ് നടുവിലേതിൽ എന്നിവർ പങ്കെടുത്തു.