തൈക്കാവ് പടിക്കൽ കലുങ്ക് പ​​ുനർ നിർമിക്കണം

മല്ലപ്പള്ളി: ചുങ്കപ്പാറ-കോട്ടാങ്ങൽ സി.കെ റോഡിൽ അപകടാവസ്ഥയിലായ തൈക്കാവ് പടിക്കലെ കലുങ്ക് മാറ്റി പുതിയ കലുങ്ക് നിർമിക്കണമെന്ന ആവശ്യം ശക്തമാകുന്നു. 2018 ലെ പ്രളയത്തിൽ തോട്​ കരകവിഞ്ഞ് ഒഴുകിയതിനെത്തുടർന്ന് കലുങ്കി​ൻെറ സംരക്ഷണഭിത്തികൾക്ക് ബലക്ഷയം സംഭവിച്ചിരുന്നു. ഇതോടെ കലുങ്കി​ൻെറ ഒരുവശത്ത് വിള്ളൽ രൂപപ്പെട്ടതാണ്. വർഷങ്ങൾ കഴിഞ്ഞതോടെ ഇടിഞ്ഞുതാഴാൻ തുടങ്ങി. കലുങ്ക് ഏതുനിമിഷവും നിലം പതിക്കാവുന്ന അവസ്ഥയിലെത്തിയതോടെ അപകടസൂചന അറിയിക്കാൻ നാട്ടുകാർ കമ്പി നാട്ടിയിരിക്കുകയാണ്. കലുങ്കി​ൻെറ ശോച്യാവസ്ഥ മനസ്സിലാക്കി വലിയ വാഹനങ്ങൾ ഇതുവഴി കടന്നുപോകുന്നത് നിരോധിച്ച്​ പഞ്ചായത്ത് അധികൃതർ ബോർഡ്​ സ്ഥാപിച്ചിരുന്നു. എന്നാൽ, അമിതഭാരം കയറ്റിയ നിരവധി വാഹനങ്ങളാണ് ഇതുവഴി കടന്നുപോകുന്നത്. ചുങ്കപ്പാറ-കോട്ടാങ്ങൽ പ്രധാന റോഡിൽ വാഹനഗതാഗതം തടസ്സപ്പെടുമ്പോൾ വാഹനങ്ങൾ തിരിച്ചുവിടുന്ന പ്രധാന ബൈപാസുകൂടിയാണ് സി.കെ റോഡ്. കാൽനടക്കാരും ഏറെയുണ്ട്​. കലുങ്ക് തകർന്ന് ഗതാഗതം തടസ്സമായാൽ നൂറുകണക്കിന് ആളുകൾക്ക് ദുരിതമാകും. --------- ഫോട്ടോ: ചുങ്കപ്പാറ-കോട്ടാങ്ങൽ റോഡിൽ അപകടാവസ്ഥയിലായ തൈക്കാവ് പടിക്കൽ കലുങ്ക്