കാണിക്കവഞ്ചി കുത്തിത്തുറന്ന് പണം മോഷ്​ടിച്ചു

പത്തനംതിട്ട: മാക്കാംകുന്ന് പള്ളിയങ്കണത്തിലെ കാണിക്കവഞ്ചി കുത്തിത്തുറന്ന് പതിനായിരത്തോളം രൂപ മോഷ്​ടിച്ചു. മോഷ്​ടാവി​ൻെറ ചിത്രം പള്ളിയിലെ നിരീക്ഷണ കാമറയിൽ പതിഞ്ഞിട്ടുണ്ട്. രാവിലെ പള്ളി വൃത്തിയാക്കാനെത്തിയപ്പോഴാണ് വഞ്ചി കുത്തിത്തുറന്ന നിലയിൽ കണ്ടത്. ഭാരവാഹികൾ വിവരമറിയിച്ചതിനെ തുടർന്ന് പത്തനംതിട്ട പൊലീസും വിരലടയാള വിദഗ്​ധരും സ്ഥലത്തെത്തി തെളിവ് ശേഖരിച്ചു. ബുധനാഴ്ച ഉച്ചക്ക്​ 1.45നാണ് സംഭവം. പ്രാർഥിക്കാനെന്ന വ്യാജേന എത്തിയ ആളാണ് മോഷണം നടത്തിയത്. ഇൗ സമയം പള്ളിയിൽ ആളുകൾ കുറവായിരുന്നു. കുറേനേരം അകത്ത് കറങ്ങിയശേഷം സമീപത്തെ ബെഞ്ചിൽ മോഷ്​ടാവ് ഇരിക്കുന്നതായി ദൃശ്യങ്ങളിൽ വ്യക്തമായിട്ടുണ്ട്. തുടർന്ന് ചിത്രത്തിന് സമീപത്തായി കസേരയിൽ വെച്ചിരുന്ന നേർച്ച വഞ്ചിയുമായി മുകളിലത്തെ നിലയിലേക്ക് കയറിപ്പോകുകയായിരുന്നു. ഇവിടെ വെച്ച് വഞ്ചി കുത്തിപ്പൊളിച്ച് പണവുമായി ഇയാൾ പുറത്തേക്ക് പോയി. Photo. മോഷണം നടന്ന സ്ഥലത്ത് പൊലീസ് തെളിവ് ശേഖരിക്കുന്നു