ആനയടി -കൂടൽ റോഡ്: കുരമ്പാല തെക്ക് ഭാഗത്തെ ടാറിങ്​ ഉടൻ

പന്തളം: ആനയടി കൂടൽ റോഡിന്​ സ്ഥലം ഏറ്റെടുക്കുന്നതുമായി ബന്ധപ്പെട്ട് കുരമ്പാല തെക്ക് ഭാഗത്തെ പ്രശ്നങ്ങൾക്ക് പരിഹാരമായി. ഡെപ്യൂട്ടി സ്പീക്കർ ചിറ്റയം ഗോപകുമാർ സ്ഥലം സന്ദർശിച്ച് പ്രദേശവാസികളുമായി നടത്തിയ ചർച്ചയുടെ അടിസ്ഥാനത്തിലാണ് പ്രശ്നങ്ങൾക്ക് പരിഹാരം ആയത്. ഇത് സംബസിച്ച് 'മാധ്യമം' കഴിഞ്ഞ ദിവസം വാർത്ത നൽകിയിരുന്നു. റോഡി​ൻെറ സൈഡ് കെട്ട്, ഓട നിർമാണം എന്നിവ സംബന്ധിച്ച് പ്രദേശത്തുകാർ ഉന്നയിച്ച ആവശ്യങ്ങൾ സംബന്ധിച്ച് ചിറ്റയം ഉദ്യോഗസ്ഥർക്ക് നിർദേശങ്ങൾ നൽകി. ഓട നിർമിക്കാനും സൈഡ് കെട്ടി പ്രൊട്ടക്​ഷൻ വാൾ നിർമിക്കാനും റോഡ് ടാറിങ് ആരംഭിക്കാനും ധാരണയായി. ബുധനാഴ്​ച മുതൽ ടാറിങ്​ പുനരാരംഭിക്കുമെന്നും റോഡ് ഉടൻ സഞ്ചാരയോഗ്യമാക്കി ഗതാഗതത്തിന്​ തുറന്ന് കൊടുക്കാൻ സാധിക്കുമെന്നും ചിറ്റയം ഗോപകുമാർ പറഞ്ഞു. കേരള റോഡ് ഫണ്ട് ബോർഡ് എക്സിക്യൂട്ടിവ് എൻജിനീയർ, അസി. എക്സിക്യൂട്ടിവ് എൻജിനീയർ, കരാറുകാരൻ, വാർഡ് കൗൺസിലർ രാജേഷ് കുമാർ, മാധവനുണ്ണിത്താൻ തുടങ്ങിയവരും ഡെപ്യൂട്ടി സ്പീക്കർക്കൊപ്പം ഉണ്ടായിരുന്നു. ഫോട്ടോ: ആനയടി കൂടൽ റോഡിന് സ്ഥലം ഏറ്റെടുക്കലുമായി ബന്ധപ്പെട്ട്​ ഡെപ്യൂട്ടി സ്പീക്കർ ചിറ്റയം ഗോപകുമാർ സ്ഥലം സന്ദർശിക്കുന്നു