വിരിഞ്ഞു കുഞ്ഞിളം കൈകളില്‍ ശാസ്ത്രവിസ്മയങ്ങള്‍; 56 പോയന്റുമായി വേങ്ങര ഉപജില്ല മുന്നില്‍
കോട്ടക്കല്‍: കൗമാരപ്രതിഭകളുടെ കുഞ്ഞിളംമനസ്സുകളില്‍ വിരിഞ്ഞ വിസ്മയച്ചെപ്പുകള്‍ തുറന്ന 37ാമത് ജില്ല സ്കൂള് ശാസ്‌ത്രോത്സവത്തിന്റെ ആദ്യദിനം അവിസ്മരണീയം. ആതിഥേയരായ എടരിക്കോട് പി.കെ.എം.എം.എച്ച്.എസ്.എസിലും ക്ലാരി ജി.യു.പി സ്‌കൂളിലും മത്സരങ്ങള്‍ അവസാനിച്ചപ്പോള്‍ 256 പോയന്റുമായി വേങ്ങര ഉപജില്ല ജൈത്രയാത്ര ആരംഭിച്ചു. 239 പോയന്റുമായി മഞ്ചേരി രണ്ടാംസ്ഥാനത്തും 226 പോയന്റോടെ കൊണ്ടോട്ടി മൂന്നാം സ്ഥാനത്തുമാണ്. 216 പോയന്റുളള മങ്കടയാണ് തൊട്ടുപിന്നിലുള്ളത്.
സ്കൂള് തലത്തില്‍ മഞ്ചേരി എച്ച്.എം.വൈ.എച്ച്.എസ്.എസ് (90) ആണ് മുന്നില്‍. മഞ്ചേരി ജി.ബി.എച്ച്.എസ്.എസ് (84), വെള്ളിയഞ്ചേരി എ.എസ്.എം.എച്ച്.എസ് (84) സ്‌കൂളുകളാണ് തൊട്ടുപിന്നിലുള്ളത്. ഇതോടൊപ്പം 52 വൊക്കേഷനല്‍ ഹയര്‍സെക്കൻഡറി സ്‌കൂളുകളിലെ 364 കുട്ടികള്‍ പങ്കെടുക്കുന്ന (കുറ്റിപ്പുറം മേഖല) വിദ്യാർഥികള്‍ മാറ്റുരക്കുന്ന നൈപുണ്യമേളയും ആകര്‍ഷകമായി. ജില്ല ശാസ്‌ത്രോത്സവം എം.പി. അബ്ദുസ്സമദ് സമദാനി എം.പി ഉദ്ഘാടനം ചെയ്തു. ജില്ല പഞ്ചായത്ത് പ്രസിഡന്റ് പി.എ. ജബ്ബാര്‍ ഹാജി അധ്യക്ഷത വഹിച്ചു. ഡി.ഡി.ഇ സലാഹുദ്ദീന്‍ പുല്ലത്ത്, അഡ്മിനിസ്‌ട്രേറ്റിവ് അസിസ്റ്റന്റ് ഇ. ഷറഫുദ്ദീന്‍, പഞ്ചായത്ത് പ്രസിഡന്റ് റൈഹാനത്ത് ബീഗം തൈക്കാടന്‍, ബഷീര്‍ പൂഴിക്കല്‍, പ്രമോദ് വാഴങ്കര എന്നിവര്‍ സംസാരിച്ചു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.