ഉച്ചഭക്ഷണത്തിന്​ പകരം കിറ്റ്​; ജില്ലയിൽ വിതരണം ആരംഭിച്ചു

ഉച്ച ഭക്ഷണത്തിന്​ പകരം കിറ്റ്​; ജില്ലയിൽ വിതരണം ആരംഭിച്ചു 957 സ്​കൂളുകളിൽ 3,50,790 കിറ്റുകൾ 20ന്​ മുമ്പ്​ വിതരണം ചെയ്യും മലപ്പുറം: ജില്ലയിൽ ഉച്ചഭക്ഷണ പദ്ധതിയിൽ ഉൾപ്പെട്ട പ്രീ പ്രൈമറി മുതൽ എട്ടാംക്ലാസ്​ വരെയുള്ള വിദ്യാർഥികൾക്ക്​ ആഹാരസാധനങ്ങളുടെ കിറ്റ്​ വിതരണം തുടങ്ങി. അരിയും പലവ്യഞ്​ജനവും ഉൾപ്പെടെ ഒമ്പതിനങ്ങളാണ്​ വിതരണം ചെയ്യുന്നത്​. രണ്ട്​ കിലോ അരി, കടല, ചെറുപയർ, പരിപ്പ്​ എന്നിവ അരക്കിലോ, ആട്ട, ഉപ്പ്​, മുളകു​പൊടി, മഞ്ഞൾ എന്നിവയാണ്​ കിറ്റിലുള്ളത്​. സർക്കാർ-എയ്​ഡഡ്​ സ്​കൂളുകളിലെ കുട്ടികൾക്ക്​ പ്രയോജനം ലഭിക്കുന്ന പദ്ധതി അതത്​ പ്രദേശത്തെ മാവേലി സ്​റ്റോറുകളുടെ നേതൃത്വത്തിലാണ്​​​ കിറ്റുകൾ പാക്​ ചെയ്യുന്നത്​. അവ സ്​കൂളുകളിൽ എത്തിച്ച്​ വിതരണം ചെയ്യും. മഞ്ചേരി, പൊന്നാനി, പെരിന്തൽമണ്ണ, തിരൂർ എന്നീ സപ്ലൈകോ ഡിപ്പോകൾക്കാണ്​​ ഏകോപന ചുമതല​. ഈ ഡിപ്പോകൾക്ക്​ കീഴിൽ 957 സ്​കൂളുകളിൽ 3,50,790 കിറ്റുകൾ ജൂലൈ 20ന്​ മുമ്പ്​ വിതരണം ചെയ്യും. പ്രീപ്രൈമറി വിഭാഗത്തിനാണ്​ ആദ്യഘട്ടത്തിൽ കിറ്റുകൾ വിതരണം ചെയ്യുന്നത്​. അവ പൂർത്തിയായശേഷം എൽ.പി, യു.പി വിദ്യാർഥികൾക്ക്​ വിതരണം ചെയ്യും​. ​മഞ്ചേരി ഡിപ്പോക്ക്​ കീഴിൽ 287 സ്​കൂളുകളാണുള്ളത്​. 9000ഓളം പ്രൈമറി വിദ്യാർഥികൾക്കുള്ള കിറ്റുകളിൽ 1800 പേർക്ക്​ വിതരണത്തിന്​ തയാറായി. 60,000 കിറ്റുകൾ എൽ.പിക്കും 30,000 യു.പി സ്​കൂൾ വിദ്യാർഥികൾക്കും​ വിതരണം ചെയ്യും. പെരിന്തൽമണ്ണ ഡിപ്പോയിൽ 205 സ്​കൂളുകളിൽ 81,609 കിറ്റുകൾ​ വിതരണം ചെയ്യുന്നുണ്ട്​​. പ്രീപ്രൈമറി വിഭാഗത്തിൽ 8357 കിറ്റുകൾ വിതരണം ചെയ്യാനുള്ളതിൽ 5323 എണ്ണം സ്​കൂളുകളിൽ എത്തിച്ചു. എൽ.പിയിൽ 44,014 കിറ്റുകളും യു.പിയിൽ 29,208 കിറ്റുകളും വിതരണം ചെയ്യും. തിരൂർ ഡിപ്പോക്ക്​ കീഴിൽ 330 സ്​കൂളുകളിലായി 1,31,974 കിറ്റുകൾ വിതരണം ചെയ്യുന്നുണ്ട്. പ്രീ പ്രൈമറിക്ക്​ 10,631 കിറ്റുകളും എൽ.പിക്ക്​ 73,570 കിറ്റുകളും യു.പിക്ക്​ 47,773 കിറ്റുകളും വിതരണം ചെയ്യും. അതിൽ പ്രീപ്രൈമറിക്ക്​ 5000ഓളം കിറ്റുകൾ വിതരണം ചെയ്​തു. പൊന്നാനി ഡിപ്പോക്ക്​ കീഴിൽ 132 സ്​കൂളുകളിലായി 38,207 കിറ്റുകളാണ്​​ വിതരണം ചെയ്യുന്നത്​. 1200ഓളം കിറ്റുകൾ പാക്ക്​ ചെയ്​ത്​ സ്​കൂളുകളിൽ എത്തിച്ചു. m3ma1