കോവിഡ്​ വ്യാപനം: പ്രതിരോധനടപടികൾ ശക്തമാക്കാൻ നിർദേശം

കോട്ടയം: സംസ്ഥാനത്ത്​ കോവിഡ് പിടിമുറുക്കുന്ന പശ്ചാത്തലത്തിൽ പ്രതിരോധ പ്രവർത്തനത്തനങ്ങൾ കാര്യക്ഷമമാക്കാൻ സ്വകാര്യ, സർക്കാർ, അർധസർക്കാർ സ്ഥാപനങ്ങൾക്ക്​ ആരോഗ്യവകുപ്പ്​ നിർദേശം. സമ്പർക്കത്തിലൂടെയും ഉറവിടം അറിയാത്തതുമായ കേസുകൾ വർധിക്കുന്ന സാഹചര്യത്തിൽ വരുംദിവസങ്ങളിൽ നടപടി കടുപ്പിക്കുമെന്ന മുന്നറിയിപ്പും നൽകിയിട്ടുണ്ട്​. പ്രതിരോധ പ്രവർത്തനങ്ങൾക്ക്​ സർക്കാർ അനുമതി​ കാത്തിരിക്കാതെ സ്വയം സുരക്ഷ ഒരുക്കണമെന്ന്​ വകുപ്പ്​ മേധാവികൾക്കും ജില്ല ഭരണകൂടങ്ങൾക്കുമുള്ള നിർദേശത്തിൽ പറയുന്നു. ഇതനുസരിച്ച്​ സംസ്ഥാനത്തെ മുഴുവൻ സർക്കാർ-അർധ സർക്കാർ-പൊതുമേഖല സ്ഥാപനങ്ങളും മുൻകരുതൽ നടപടി സ്വീകരിച്ചുതുടങ്ങി. സർക്കാർ-സ്വകാര്യ സ്ഥാപനങ്ങളുമായി ബന്ധപ്പെടുന്നവർക്കും മാർഗനി​ർദേശങ്ങൾ ബാധകമാണ്​. ചെറുകിട, വൻകിട ഫാക്​ടറികൾ, വ്യവസായ യൂനിറ്റുകൾ എന്നിവക്ക്​ പ്ര​േത്യക മാർഗനി​ർദേശങ്ങളാണ്​ നൽകുക. ഇനിയുള്ള ദിവസങ്ങളിൽ കർശന നിയന്ത്രണങ്ങൾ​ നടപ്പാക്കുമെന്ന്​ ആരോഗ്യവകുപ്പ്​ അറിയിച്ചു​. പ്രതിരോധ പ്രവർത്തനങ്ങൾക്കായി സ്വകാര്യ ആശുപത്രികളുടെ സഹായം ഉറപ്പുവരുത്തിയിട്ടുണ്ട്​. പൊതുഗതാഗതം തുടരുന്ന സാഹചര്യത്തിൽ സ്വകാര്യ ബസുകൾക്കും സുരക്ഷ സംബന്ധിച്ച​ മാർഗനിർദേശങ്ങൾ ആരോഗ്യവകുപ്പ്​ നൽകും. രോഗവ്യാപനം അനിയന്ത്രിതമായ സാഹചര്യത്തിൽ പൊതുഗതാഗതത്തിന് ഉപയോഗിക്കുന്ന ബസുകൾ ദിവസവും അണുവിമുക്തമാക്കണം. ഇതിനായി കെ.എസ്​.ആർ.ടി.സി സാനിറ്ററൈസിങ്​ പമ്പുകളും അണുനാശിനി ലായനിയും എല്ലാ ഡിപ്പോകൾക്കും ലഭ്യമാക്കും. കണ്ടക്ടർമാർ, ഡ്രൈവർമാർ എന്നിവർക്ക്​ ഫേസ് ഷീൽഡ്, ഗ്ലൗസ്, സാനിറ്റൈസർ എന്നിവ നൽകും. ആദ്യഘട്ടത്തിൽ 151 സാനിറ്റൈസിങ്​ പമ്പുകളും 4000​േത്താളം ലിറ്റർ ഹാൻഡ് സാനിറ്റൈസറും 1.62ലക്ഷം റീയൂസബിൾ മാസ്കും 136 പി.പി.ഇ കിറ്റും 2243 ലിറ്റർ ഡിസ്ഇൻഫെക്റ്റൻറും 14,477 ഫേസ് ഷീൽഡും സോപ്പും യൂനിറ്റുകൾക്ക്​ കൈമാറിയതായി കെ.എസ്​.ആർ.ടി.സി അറിയിച്ചു.