ആർക്കാണ്​ നിങ്ങൾ 'ലൈഫ്​' നൽകുന്നത് ?​

പരപ്പ: ആർക്കാണ്​ സർ നിങ്ങൾ 'ലൈഫ്'​ നൽകുന്നത്​? സദാശിവ​െൻറ താമസസ്​ഥലവും ജീവിതവും കണ്ടാൽ ആരും സർക്കാറിനോട്​ ചോദിച്ചുപോകും. വീടില്ലാത്തവന്​ ജീവിതത്തി​െൻറ താങ്ങ്​ എന്ന്​ ഉദ്​ഘോഷിക്കുന്ന ലൈഫ്​ ഭവനപദ്ധതിയിൽ ബാർബർ സദാശിവൻ ഉൾപ്പെടില്ലേ? ലൈഫ്​​ പദ്ധതിയിൽ ലഭിച്ച വീടിനെ ഇരുനില മാളികയാക്കുന്ന ഗുണഭോക്​താക്കളുള്ള നാട്ടിൽ, കുറച്ചധികം സ്​ഥലമുണ്ടെന്ന പേരിൽ തഴയപ്പെട്ടയാളാണ്​ ബാർബർ സദാശിവൻ. ​

നിത്യരോഗിയായി മലമുകളിൽ ഭാര്യയോടൊപ്പം ദുരിത ജീവിതം നയിക്കുന്നത്​ കൺകുളിർക്കെ കണ്ടാൽ ലൈഫി​െൻറ മാനദണ്ഡങ്ങൾ മാറ്റേണ്ടിവരും. 25 സെൻറിനു താഴെ സ്​ഥലമുള്ളവർക്കാണ്​ ലൈഫ്​ പദ്ധതിയിൽ വീട്​ നൽകുന്നത്​. മലമുകളിൽ ഓലക്കുടിലിൽ താമസിക്കുന്ന സദാശിവന്​ 60 സെൻറ്​ സ്​ഥലമുണ്ട്​. അതാണ്​ വീട്​ ലഭിക്കാത്തതിന്​ കാരണം. ബളാൽ ഗ്രാമപഞ്ചായത്തിലെ പായാളം മലമുകളിലാണ്​ പടിഞ്ഞാറെ പുരയിൽ സദാശിവനും ഭാര്യ രമണിയും താമസിക്കുന്നത്​.

പ്രായത്തിനൊപ്പം അപൂർവ രോഗം പിടിപെട്ടതിനാൽ സദാശിവന്​ ജോലി ചെയ്യാൻ കഴിയില്ല. മരുന്നി​െൻറ ശക്​തിയിലാണ്​ ജീവിച്ചുപോകുന്നത്​. മരുന്നു​ വാങ്ങാനും പണമില്ല. പഞ്ചായത്ത്​്​ വൈസ്​ പ്രസിഡൻറ്​ രാധാമണിയുടെ സഹായത്താൽ പാലിയേറ്റിവുകാരെ ബന്ധപ്പെടുത്തിയാണ്​ ഇപ്പോൾ മരുന്ന്​ ലഭിക്കുന്നത്​. മരുന്നും ജീവിത ചെലവും എല്ലാംചേർത്ത്​ മുന്നോട്ടുപോകാൻ കഴിയാത്ത അവസ്​ഥയിലാണ്​ സദാശിവൻ.

പതിനൊന്നാം വയസ്സിലാണ്​ കോട്ടയം ജില്ലയിൽ നിന്നും പരപ്പയിൽ എത്തിയത്​. ഈ പ്രായത്തിൽതന്നെ പരപ്പയിൽ ബാർബർ ഷോപ് തുടങ്ങി. 2017ൽ തലച്ചോറിലേക്കുള്ള ഞരമ്പ് മുറിഞ്ഞ്​ കിടപ്പിലായി. ഇപ്പോഴും കിടപ്പിൽ കഴിയുന്ന സദാശിവനെ നാട്ടുകാരും സുമനസ്സുകളും കൈകോർത്ത്​ ചികിത്സിച്ചുവരുന്നു. വിവിധ ആശുപത്രികളിലായി എട്ടുലക്ഷം രൂപയോളം ചെലവായി. ഉദാരമതികളും ബാർബർ അസോസിയേഷൻ ജില്ല കമ്മിറ്റിയും സദാശിവനെ സഹായിച്ചിട്ടുണ്ട്.

പഞ്ചായത്തി​െൻറ പാലിയേറ്റിവ് പ്രവർത്തകർ സദാശിവനെ പരിചരിച്ച്​ മരുന്നുകൾ നൽകുന്നുണ്ടെങ്കിലും മിക്ക മരുന്നുകളും പുറത്തുനിന്നും വാങ്ങേണ്ടതാണ്. പ്രതിമാസം നല്ല തുക ഇതിനായി വേണം. ഇവരുടെ പെൺമക്കൾ അന്യജില്ലകളിലാണ്​. കോവിഡ്​ കാരണം എത്താനും കഴിയുന്നില്ല.

പായാളം മലമുകളിലെ മലഞ്ചെരുവിൽ ഓലകൊണ്ടും പ്ലാസ്​റ്റിക് ഷീറ്റുകൊണ്ടും കെട്ടിയ കുടിലിലാണ് ഇപ്പോൾ സദാശിവനും ഭാര്യ രമണിയും താമസിക്കുന്നത്. പരസഹായമില്ലാതെ എഴുന്നേറ്റിരിക്കാൻ പോലും കഴിയാത്ത സദാശിവൻ അലിവുള്ള മനസ്സുകൾ തേടുകയാണ്. നഗരങ്ങളിലും മലയോരത്തും ഒരേ മാനദണ്ഡമുണ്ടായതാണ്​ സദാശിവനെ പോലുള്ളവർ തഴയപ്പെടാൻ കാരണമെന്ന്​ ബളാൽ പഞ്ചായത്ത്​ വൈസ്​ പ്രസിഡൻറ്​ രാധാമണി പറയുന്നു. പ്രധാനമന്ത്രിയുടെ ആവാസ്​ യോജനയിൽ സദാശിവ​െൻറ പേരുണ്ട്​. അതിൽ വീട്​ നൽകാൻ ശ്രമിക്കുമെന്നും രാധാമണി പറഞ്ഞു.