ബി.ജെ.പിയിലെ തർക്കം: കേന്ദ്ര സർവകലാശാല വി.സി സ്​ഥാനം മലയാളിക്ക്​ നഷ്​ടപ്പെ​േട്ടക്കും

കാസർകോട്​: കേന്ദ്ര സർവകലാശാലയിലെ നിയമനങ്ങളുമായി ബന്ധ​പ്പെട്ട്​ ബി.ജെ.പി-ആർ.എസ്​.എസ്​ സംഘടനകളിലെ തർക്കം കാരണം മലയാളിക്ക്​ വി.സി സ്​ഥാനം നഷ്​ടപ്പെടാൻ സാധ്യത. രാഷ്​ട്രപതിക്ക്​ സമർപ്പിച്ച പട്ടികയിലെ രണ്ട്​ മലയാളി പേരുകളുമായി ബന്ധപ്പെട്ടാണ്​ ​സംഘടനയിൽ തർക്കം. അതിനാലാണ്​​ താൽക്കാലിക വി.സിയെ നിയമിക്കേണ്ടിവന്നത്​ എന്നാണ്​ സൂചന. പ്രഥമ വൈസ്​ ചാൻസലർ ഡോ. ജാൻസി ജയിംസിനു ശേഷമാണ്​ ഡോ. ജി. ഗോപകുമാർ വിസിയാവുന്നത്​. കേരള കേന്ദ്ര സർവകലാശാല അധിപൻ മലയാളി തന്നെയാകണമെന്ന്​​ കോൺഗ്രസ്​ തുടങ്ങിവെച്ച കീഴ്​വഴക്കമാണ്​ ഗോപകുമാറിലേക്ക്​ ബി.ജെ.പിയെ എത്തിച്ചത്​. 2019 ആഗസ്​റ്റ്​ ആറിന്​ ജി. ഗോപകുമാറി​ൻെറ കാലാവധി അവസാനിച്ചുവെങ്കിലും പകരക്കാരനെ കണ്ടെത്താൻ ബി.ജെ.പി നേതൃത്വത്തിന്​ കഴിഞ്ഞില്ല. ഭാരതീയ വിചാര കേന്ദ്രം വൈസ്​ പ്രസിഡൻറ്​ ആയിരിക്കെ സർവകലാശാലയിലെത്തി പ്രോ. വി.സി സ്​ഥാനത്ത്​ എത്തിയ ഡോ. കെ. ജയപ്രസാദി​ൻെറ നേതൃത്വത്തിലും ജയപ്രസാദി​ൻെറ നിർദേശങ്ങൾ അംഗീകരിക്കരുതെന്ന്​ കേന്ദ്ര സർക്കാറിൽ സമ്മർദം ചെലുത്തി കെ. സുരേന്ദ്ര​ൻെറ നേതൃത്വത്തിലും നടന്ന നീക്കങ്ങൾ കാരണമാണ്​ വി.സി നിയമനം നടക്കാതെ പോയതെന്നാണ്​ ആരോപണം. നിയമനത്തിന്​ 10 പേരുടെ പട്ടികയും പിന്നാലെ അഞ്ചുപേരുടെ ചുരുക്കപ്പട്ടികയും രാഷ്​ട്രപതിക്ക്​ സമർപ്പിച്ചിട്ടും വി.സിയെ തിരഞ്ഞെടുക്കാൻ കഴിഞ്ഞില്ല. ചുമതല പി.വി.സി ഡോ. കെ. ജയപ്രസാദിന്​ നൽകാൻ കണ്ണൂർക്കാരനായ കേന്ദ്ര മാനവശേഷി മന്ത്രാലയം അണ്ടർ സെക്രട്ടറി തയാറാക്കിയ കത്ത്​ പുറത്തുവന്നു. വി.സി ചുമതല മുതിർന്ന ​പ്രഫസർക്കോ പ്രോ. വിസിക്കോ നൽകണമെന്നായിരുന്നു കത്ത്​. കത്ത്​ പുറത്തായതോടെ അതി​ൻെറ സാധുത ചോദ്യംചെയ്യപ്പെട്ടു. തുടർന്ന്​ കത്ത്​ പിൻവലിച്ചു. പിന്നീടാണ്​ ഡോ. കെ.സി. ബൈജുവിന്​ ചുമതല നൽകിയത്​. ഒടുവിൽ, വി.സി സ്​ഥാനത്തേക്ക്​ പരിഗണിച്ച രണ്ടു മലയാളികളെയും തള്ളി ആന്ധ്രക്കാരനായ പ്രഫസറെ വൈസ്​ ചാൻസലറാക്കാൻ നീക്കമുണ്ട്​ എന്നാണ്​ അറിയുന്നത്​. അതേസമയം, ഇ​ദ്ദേഹം കേരളത്തിലേക്ക്​ വരാൻ താൽപര്യം അറിയിച്ചിട്ടില്ലെന്നാണ്​ സൂചന.