ഗതാഗത പരിഷ്​കാരങ്ങൾ നടപ്പായില്ല; കുരുക്ക്​ അഴിയാതെ നെടുങ്കണ്ടം

നെടുങ്കണ്ടം: താലൂക്ക്​ ആസ്ഥാനമായ നെടുങ്കണ്ടം ടൗണിൽ ഗതാഗത പരിഷ്​കാരം ഇനിയും യാഥാർഥ്യമായില്ല. ടൗണിലെ ഗതാഗതക്കുരുക്ക് ഒഴിവാക്കാൻ നെടുങ്കണ്ടം ഗതാഗത ഉപദേശക സമിതി യോഗം ചേർന്ന്​ 16 നിർദേശങ്ങൾ പുറപ്പെടുവിക്കുകയും ഇവ ബന്ധപ്പെട്ട വകുപ്പുകളുമായി ചേർന്ന്​ നടപ്പാക്കാനും തീരുമാനിച്ചിരുന്നു. പാർക്കിങ്ങും അമിത വേഗവും വർധിച്ചതോടെ കാൽനടക്കാർ ത്രിശങ്കുവിലാണ്. കിഴക്കേ കവല മുതൽ പടിഞ്ഞാറേ കവലവരെ കുട്ടികൾക്കും സ്​ത്രീകൾക്കും വയോധികർക്കും റോഡ് മുറിച്ചുകടക്കാനോ വ്യാപാര സ്ഥാപനങ്ങളിലേക്ക് പ്രവേശിക്കാനോ കഴിയാത്തവിധമുള്ള ൈഡ്രവിങ് അപകടം ക്ഷണിച്ചുവരുത്തുന്നു. റോഡിന്​ ഇരുവശത്തും പാർക്ക് ചെയ്യുന്ന വാഹനങ്ങൾ മാനദണ്ഡങ്ങൾ പാലിക്കാറില്ല. സർക്കാർ ഓഫിസിലെയും മറ്റും ജീവനക്കാരടക്കം റോഡരികിൽ രാവിലെ നിർത്തിയിടുന്ന വാഹനങ്ങൾ ഓഫിസ്​ സമയം കഴിഞ്ഞ് വൈകുന്നേരമാണ് തിരിച്ചെടുക്കുക. പാർക്ക് ചെയ്യുന്നതാക​ട്ടെ ചെറുവാഹനങ്ങൾക്കും കാൽനടക്കാർക്കും ഏറെ ബുദ്ധിമുട്ടുണ്ടാക്കും വിധവും. വ്യാപാര സ്ഥാപനങ്ങൾക്ക്​ മുന്നിൽ നിർത്തിയിടുന്ന വാഹനങ്ങൾ പ്രവേശന കവാടം അടച്ചും കാൽനടക്കാർക്ക് നടന്നുപോകാൻ കഴിയാത്ത വിധത്തിലുമാണ്. കുമളി-മൂന്നാർ സംസ്ഥാന പാത കടന്നുപോകുന്ന കിഴക്കേ കവല കോടതി ജങ്ഷൻ മുതൽ ബസ്​സ്​റ്റാൻഡ്​​ ജങ്​ഷൻവരെ റോഡിന്​ ഇരുവശത്തും അനധികൃതമായാണ് പാർക്കിങ്​. ബി.എഡ് കോളജ് ജങ്​ഷൻ മുതൽ പടിഞ്ഞാറെ കവലവരെ ബസുകൾ നിർത്തി യാത്രക്കാരെ കയറ്റിയിറക്കുന്നത് തോന്നിയതുപോലെയാണ്. എവിടെ യാത്രക്കാർ കൈകാണിക്കുന്നുവോ അവിടെ നിർത്തും. ഇത് പലപ്പോഴും പിന്നാലെ എത്തുന്ന വാഹനങ്ങൾ മുന്നിൽ നിർത്തുന്ന ബസുകളിൽ ഇടിക്കാൻ കാരണമാകുന്നു. വേഗം കുറച്ചോ സിഗ്​നൽ നൽകിയോ അല്ല പല ബസുകളും ടൗണിൽ നിർത്തുന്നത്. ടൗണിൽ സീബ്രലൈനുകൾ ഉള്ള സ്ഥലത്ത് വാഹനങ്ങൾ നിർത്തുകയോ വേഗം കുറച്ചോ കാൽനടക്കാർക്ക് കടന്നുപോകാൻ അവസരം നൽകാറില്ല. അഞ്ച് റോഡുകൾ സംഗമിക്കുന്ന കിഴക്കേ കവലയിലും നാല് റോഡുകൾ ചേരുന്ന പടിഞ്ഞാറെ കവലയിലും ട്രാഫിക് ഐലൻഡ്​​ സ്ഥാപിക്കണമെന്ന ആവശ്യത്തിനും നടപടി സ്വീകരിച്ചിട്ടില്ല. വാഹനങ്ങളുടെ അമിത വേഗവും പരിഹാരമില്ല. കിഴക്കേ കവലയിൽനിന്ന്​ താന്നിമൂടിനു തിരിയുന്നിടത്ത് റോഡിന്​ ഇരുവശത്തും അലക്ഷ്യമായി വാഹനങ്ങൾ പാർക്ക് ചെയ്യുന്നത് അപകടസാധ്യത വർധിപ്പിക്കുന്നു. ചരക്കുലോറികളും മറ്റും ഇവിടെ മണിക്കൂറോളമാണ് പാർക്ക് ചെയ്യുന്നത്. മാത്രവുമല്ല കോമ്പയാർ റൂട്ടിലേക്കുള്ള ബസ്​ സ്​റ്റോപ് കൂടിയാണിവിടം. ബസ്​ പാർക്ക് ചെയ്യുന്നതിൻെറ മുന്നിലും പിന്നിലും ഇരുവശത്തും ഓ​ട്ടോകളും ജീപ്പുകളും അലക്ഷ്യമായി പാർക്ക് ചെയ്യുന്നതുമൂലം കാൽനടക്കാർക്ക് ഏറെ ദുരിതം വിതക്കുകയാണ്. പ്രധാന നിർദേശങ്ങൾ -ബൈപാസ്​ ഗതാഗത സംവിധാനം ഒരുക്കുക -ഓ​ട്ടോറിക്ഷ പാർക്ക് ചെയ്യുമ്പോൾ വ്യാപാര സ്ഥാപനങ്ങൾക്ക് തടസ്സം സൃഷ്​ടിക്കാതിരിക്കുക -ട്രിപ് ജീപ്പ് പാർക്കിങ്ങിന്​ പ്രത്യേക ക്രമീകരണം -ബസുകളുടെ പാർക്കിങ്ങിന് പ്രത്യേക സ്ഥലങ്ങൾ (മൃഗാശുപത്രി മൈതാനം ക്രമീകരിക്കും) -അനധികൃത ബൈക്ക് പാർക്കിങ് നിരീക്ഷിക്കുക -സ്​കൂൾ ബസുകളുടെ സഞ്ചാരപാത രാവിലെയും വൈകുന്നേരവും കുട്ടികളെ ഇറക്കിയ ശേഷം ആശാരികണ്ടം വഴിയുള്ള ഹൈവേയിലൂടെയാക്കുക