കോഴിപ്പള്ളിക്കാർ രംഗത്തിറങ്ങി; റോഡ്​ ഗതാഗതയോഗ്യമായി

- ഹാപ്പി മൺഡേ- തൊടുപുഴ: റോഡ്​ ഗതാഗതയോഗ്യമാക്കണമെന്ന ആവശ്യവുമായി കോഴിപ്പള്ളിക്കാർ കയറിയിറങ്ങാത്ത ഇടങ്ങളില്ല. ഒരിടത്തുനിന്ന്​ അനുകൂല പ്രതികരണങ്ങളൊന്നുമുണ്ടാകാത്തതിനെ തുടർന്ന്​ ഒടുവിൽ നാട്ടുകാർതന്നെ റോഡ്​പണിക്കിറങ്ങി. ഞായറാഴ്ച രാവിലെ മുതൽ നാട്ടുകാരൊന്നടങ്കം നാട്ടിലെ വഴി പുനഃസ്ഥാപിക്കാനിറങ്ങിയതോടെ നളിയാനി-കുളമാവ് റോഡിൽ കോഴിപ്പള്ളിയിലെ തകർന്നുകിടന്ന ഭാഗത്തുകൂ​ടെ ഇപ്പോൾ വാഹനം ഓടിക്കാം. 2018ലെ പ്രളയകാലത്താണ്​ കോഴിപ്പള്ളിയിൽ മലയിടിഞ്ഞതിനെ തുടര്‍ന്നാണ്​ പ്രദേശത്തെ റോഡ്​ പൂർണമായി തകർന്ന്​ ഗതാഗതം ദുഷ്​കരമായത്​​. ഇരുകരയായി വേര്‍പെട്ടുനില്‍ക്കുന്ന റോഡ് നന്നാക്കണമെന്ന ആവശ്യം ഉന്നയിച്ച് ഇവർ നാളുകളായി അധികൃതരെ സമീപി​ച്ചെങ്കിലും ഇതൊന്നും ഫലംകണ്ടില്ല. തൊടുപുഴയിൽനിന്ന്​ ഇടുക്കിയിലേക്കെത്താനുള്ള എളുപ്പമാർമാണ്​ ഈ റോഡ്​. റോഡ്​ തകരും മുമ്പ്​ നൂറുകണക്കിനാളുകൾ സഞ്ചരിച്ചിരുന്ന വഴിയായിരുന്നു. പലരും ഇതുവഴിയുള്ള യാത്ര ഉപേക്ഷിച്ചെങ്കിലും നാട്ടുകാർക്ക്​ മറ്റൊരു വഴിയില്ലാത്തതിനാൽ കരിങ്കല്ലും മറ്റും ഇട്ട്​ താൽക്കാലികമായി ഒരു സൗകര്യമൊരുക്കിയിരുന്നു. എന്നാൽ, മഴക്കാലമെത്തുന്നതോടെ ഇതുവഴിയുള്ള യാത്ര അതിസാഹസികമാണ്​. ചളിയും മണ്ണും നിറഞ്ഞ്​ യാത്ര അപകടത്തിലാകും. ഈ സാഹചര്യത്തിലാണ്​ മഴ കനക്കുന്നതിന്​ മുമ്പ്​ നാട്ടുകാർ ശ്രമദാനമായി റോഡ്​ ഗതാഗതയോഗ്യമാക്കാൻ രംഗത്തിറങ്ങിയത്​. സാധാരണക്കാരും കൂലിപ്പണിക്കാരുമൊക്കെയാണ്​​ ഇവിടെ അധിവസിക്കുന്നവരിൽ ഭൂരിഭാഗവും. നാട്ടുകാരിൽനിന്ന്​ ഇതുവഴി സഞ്ചരിക്കുന്നവരിൽനിന്ന്​ റോഡ്​ കോൺക്രീറ്റ്​ ചെയ്യുന്നതിനും മറ്റുമായി കുറച്ച്​ തുക പിരിവ്​ നടത്തി ശേഖരിച്ചു. റോഡ്​ നിർമാണത്തിനാവശ്യമായ സിമന്‍റിന്‍റെ ഒരുഭാഗം തൊടുപുഴ റോട്ടറി ക്ലബും വാങ്ങിനല്‍കി. മെറ്റലും കല്ലും പാറപ്പൊടിയും ഇറക്കി ഞായറാഴ്ച റോഡ്​ പണിക്കായി കോഴിപ്പള്ളിക്കാർ ഒന്നായി ഇറങ്ങുകയായിരുന്നു. ​ 150 മീറ്ററോളം റോഡാണ്​ തകർന്നുകിടക്കുന്നത്​. ഇതിൽ ഏറെ ദുർഘടമായ ഭാഗമാണ്​ കോൺക്രീറ്റ്​ ചെയ്തത്​. തകർന്ന​ സ്ഥലങ്ങ​ളെല്ലാം ഇവർ കല്ലുകളിട്ട്​ അടച്ചിട്ടുണ്ട്​. ഊരുമൂപ്പന്‍ രവീന്ദ്രന്‍, പ്രമോട്ടർ എം.ബി. നിഷാദ്, വനാവകാശ സമിതി അംഗം കെ.എം. സുകുമാരന്‍, പൊതുപ്രവര്‍ത്തകന്‍ അനില്‍ രാഘവന്‍ എന്നിവർ നേതൃത്വം നൽകി. ​TDL ROAD TARING കൂവപ്പള്ളിയിൽ നാട്ടുകാരുടെ നേതൃത്വത്തിൽ തകർന്ന റോഡ്​ കോൺക്രീറ്റ്​ ചെയ്യുന്നു